TVET jalai alternatif kena nembiak nyapai aspirasyen dalam bidang kereja diri empu
Pelajar enggau Latih Teknikal enggau Vokasional (TVET) nyendiaka jalai alternatif kena nembiak nyapai aspirasyen dalam bidang kereja diri empu, ku Menteri Pelajar, Inovesyen enggau Pemansang Penau Dato Sri Roland Sagah Wee Inn.
Iya madahka mayuh cherita pemujur nembiak ti nembuka pelajar TVET sereta sida mujur nyadi ‘penengkebang kereja’ enggau diaku antarabansa iya nya kereja sida dalam industri.
“Siti ari chunto, iya nya alumni Universiti Malaysia Sarawak (UNIMAS) Franklin Lingga Abun ti nembuka program ‘Kejuruteraan Mekanikal
dan Pembuatan’,” ku iya maya bejadi Karnival TVET Sarawak 2024 ti diatur di Pusat Persidangan Serian di Serian, kemari.
Ku Sagah, rayat Sarawak nya udah numbuhka kompeni iya empu sereta ngemansangka aplikasyen ti ngena sistem ‘algoritma’ pemintar artifisyel (AI).
Berindik ari penau enggau pemandai ke dikembuan nya, iya dipilih masuk pengawa pemansik enggau sebuah komepni besai di bepalan di Eropah.
“Opis menteri aku mega udah melanja Franklin ke Finland ngambika mantaika inovasyen iya ti bepelasarka model matematik ngagai pengemeran industri enggau institusyen pelajar tinggi ba taun 2022,” ku iya.
Pengudah nya Sagah madahka perintah Sarawak nengah opis menteri iya benung ngerembaika akses ngagai pelajar ti patut ungkup rayat Sarawak ti nyengkaum bidang TVET.
Opis menteri mega ngelakuka pelajar TVET ngagai raban bansa menua tu enggau nempa pengawa bekunsi industri kena nyendiaka latih pengelandik ti nitihka peminta makit.
“Perintah Sarawak mega bisi juluk deka ngemansangka ekosistem inovatif ti kondusif di Sarawak kena matak penau biak enggau nyungkakka penumbuh ekonomi,” ku iya.
Nya alai iya enggau bebendar madahka nguasa pelajar TVET amat beguna ngagai rebak biak kena betapi enggau dunya ti majak nuju AI enggau revolusyen Industri 4.0.
Pengerami nya sama digulu Sapit Menteri iya, Datuk Francis Harden Hollis; Sapit Menteri Industri Pemakai, Komoditi enggau Pemansang Wilayah, Datuk Martin Ben; Kaban Kunsil Nengeri (ADUN) Bukit Semuja, John Illus enggau Tuai Pemesai Eksekutif Tabung Ekonomi Gagasan Anak Sarawak (Tegas), Udin Bujang.