Program Pengoperasian PPK mujur mantu mutarka isu peranak Sarawak ke nadai peranak menua di Pelilih Menua Pakan

SARIKEI: Lebih 200 iku peminta udah dirikotka datai ba Program Pengoperasian Pasukan Petugas Khas (PPK) kena mutarka isu peranak Sarawak ke nadai peranak menua di Pelilih Menua Pakan.

Kaban Kunsil Nengeri (ADUN) Pakan, Tan Sri William Mawan Ikom madahka, program nya mujur mantu raban bansa di kandang endur nya ti bisi penanggul bekaul enggau peranak menua.

“Program tu diatur pengelama tiga hari sereta sepemanjai timpuh nya, ia nerima sukung ti chukup manah ari raban ti disaran.

“Dalam program tu, sida Petugas Khas nya mantu raban bansa ti bisi penanggul bekaul enggau peranak menua, lebih agi sida ke udah bisi sukung penuh enggau udah ditukuka identiti ulih sida tuai komuniti enggau tuai komuniti bansa (KMKK) ari pelilih menua Pakan,” ku Mawan.

Iya madahka pekara nya pengudah tembu ngabas program nya di Pakan kemari.

Mawan ti mega Penyanding Penemu ba Opis Premier Sarawak ((Industri Pemakai, Komoditi enggau Pemansang Wilaya) madahka, berindik ari sukung positif ba program nya, iya minta ngambika program nya disambung dua hari agi PPK beoperesyen di Pakan.

Ku Mawan, iya temegah ati laban semua ti ngambi bagi dalam ngemujurka program nya udah meri komitmen ti chukup tinggi.

“Program tu amat beguna laban meri peluang ngagai raban bansa ngaga kad pengelala enggau surat beranak, ti endang chukup besai guna ba diri empu enggau diri sebilik jemah ila.

“Nadai dokumen pengelala diri, nya deka meri penanggul ngagai raban ti bekaul lebuh bisi pekara beguna deka diurus tauka diatur.

“Kelimpah ari nya, nadai dokumen beguna tu, tusah mimit kitai deka mindah nyengkaum anak ti amat begunaka dokumen pengelala apai indai dikena besekula enggau ti bukai,” ku Mawan.