Pemidang Datuk Mutang empas besai ngagai menua, Sarawak lebih agi komuniti Lun Bawang

Pemidang Yang Dipertua Dewan Negara Senator Datuk Mutang Tagal meri empas besai ngagai menua sereta Sarawak lebih agi komuniti Lun Bawang maya iya agi gawa.

Menteri Nembiak, Lumba enggau Main, sereta Pemansang Orang Dagang, Dato Sri Abdul Karim Rahman Hamzah madahka, niang nya mayuh meri jasa gawa dalam politik.

“Mutang udah gawa nyadi Kaban Parlimen (MP) dua penggal seraya iya siku ari pemesai bansa Orang Ulu ti tebangkar tauka manah amat.

“Di Dewan Negara, niang din pengelama tiga bulan aja tang iya sama meri jasa dalam mayuh pekara bukai sekalika nyadi kaban parlimen tauka nyadi luya laban iya mega siku luya,” ku Menteri Dagang Temuai, Industri Kreatif enggau Seni Pemerindang.

Iya madahka pekara nya maya dirandau raban pengarang berita pengudah bejadi

Festival Pemakai sereta Adat enggau Main Asal Samarahan 2024 ti diatur di Aiman Mall ditu, malam ensanus.

Opis Yang Dipertua Dewan Negara dalam siti penerang rasmi ensanus madahka, Mutang, 70, ngapuska seput kepenudi urung pukul 11.46 pagi ba Institut Jantung Negara (IJN) Kuala Lumpur.

Dulu ari nya, niang diperubat di IJN maya iya datai di Malaysia kena 6 Mei tu tadi pengudah datai ari Azerbaijan bejalaika kereja rasmi iya.

Niang ninggalka siku balu enggau tiga iku anak.

Mutang ti ada kena 5 Oktober 1954, udah dipilih nyadi Yang Dipertua Dewan Negara ti ke-20 enggau udah angkat sumpah mangku pengawa nya di Dewan Negara kena 19 Februari 2024.

Iya ti dichirika mangku pengawa nya udah nyadika Mutang ti asal ari Lawas nempa sejarah iya empu, nyadi pemesai keterubah ari etnik Lun Bawang dichiri nyadi Yang Dipertua Dewan Negara.