Perintah Sarawak berunding ngubah baru sitak DUN
Sadang penemu ngubah baru sitak DUN ngena demografi bechampur deka dikenataika ngagai SPR bekaul sitak baru ti deka ditumbuhka
KUCHING: Perintah Sarawak benung ngerunding deka ngubah baru sitak Kunsil Nengeri (DUN) taun tu, ku Premier Sarawak Datuk Patinggi Tan Sri Abang Johari Tun Openg.
“Pemayuh kebendar sitak ti deka ditambah apin ulih ditetapka laban pemutus nya ” ba sida SPR. Datuk Patinggi Tan Sri Abang Johari Tun Openg
Iya madahka, pengudah diubah baru, perintah deka ngenataika sadang penemu nya ngagai Suruhanjaya Pilihan Raya (SPR) bekaul enggau sitak baru ti deka ditumbuhka.
Sadang penemu nya ku iya, nyengkaum deka numbuhka sitak DUN ngena demografi bechampur dikena nentuka pengari ti dipilih ari semua bansa.
“Pemayuh kebendar sitak ti deka ditambah apin ulih ditetapka laban pemutus nya ba sida SPR.
“Taja pia, ke udah ditemu kitai perintah nengeri meri sadang penemu sitak pengawa bepilih ti patut ditumbuhka enggau patut bisi sekeda parameter pugu kena bejalaika tuju nya.
“Keterubah, sitak nya mesti nyengkaum ari konstitusyen bechampur, reti ia semua bansa bisi dia enggau kedua, mesti bisi pengari ti sebela entara mengeri enggau menua pesisir,” terang iya.
Abang Johari ti mega Chairman Gabungan Parti Sarawak (GPS) madahka pekara nya maya baum pengarang berita pengudah nyadi chairman aum ‘Kepimpinan Tertinggi GPS ti diatur ba Indu Opis Parti Pesaka Bumiputera Bersatu (PBB) ditu, kemari.
Ba bulan Januari taun tu tadi, Abang Johari ti mega Presiden PBB madahka sida
iya deka ngenataika sadang penemu pasal pengawa pemansik magi tauka ngatur baru sitak pengawa bepilih di Sarawak ngagai SPR.
Ku iya, perintah nengeri bisi komiti khas ti bejalaika tanggung pengawa meda enggau mansik isu ngatur baru sitak sebedau sadang penemu nya dikenataika ngagai SPR.
Sebedau nya. Chairman SPR Tan Sri Abdul Ghani Salleh dalam siti penerang madahka SPR benung berunding enggau mansik pematut pengawa bejalaika pemansik pasal ngatur baru sitak di Sarawak.
Iya madahka atur mansik
pengawa ngatur baru sitak pengawa bepilih ke udah bisi, semina ulih dipejalaika pengudah abis timpuh lapan taun ari hari bulan timpuh pengawa pemansik ke dulu ari nya tauka enti bisi ubah ba komposisi penyampau raban Kaban Dewan Rakyat tauka DUN.
Kepenudi Sarawak bisi bejalaika pengawa ngatur baru sitak pengawa bepilih iya nya ba taun 2016, ti bisi nambah 11 sitak DUN.
Tu lalu nyadika Sarawak bisi sitak DUN pemadu mayuh di menua tu enggau penyampau semua bisi 82 sitak sereta Parlimen bisi 31 sitak.