Denis Macari, campian dou moundou de pesca souta-marina
Venìa d’una vielha familha mentounasca. Tout’a soua vita, en tant, a partichipà à e atività de nouaisha vila. Naishù à Mentan en 1920 doun’u se parente avìan ra « Pension Mimosa », ent’a carriera Boyer à r’ empiaçament de r’oustà Chambord d’ahù. A countinuà ra tradician oustelìa da familha fint’en 1992 dam’a gestian de r’« Hotel du Pin doré », avenùa Felix Faure e s’a Proumenada. Ou pen esiste sempre e fa vé ou sen passà mentounasc ent’ou mitan de bastisse nove !
Emplicà ent’a vita assouciativa e poulìtica de Mentan, Denis Macari, durent 12 anne, ese stach souta-mera dou Generale Aubert, mera da vila. Sochou dou Rotary Club e da SAHM tamben couma souta-president, ese stach un ome generous, afàbile e defensoù afougà dou Païs Mentounasc. Praticava tamben dame passian, a pesca soutamarina dam’ou sen amig Jean Lamoureux.
En 1947, ha pourtà aut ou renoum de Mentan coura ese devengù campian dou moundou de pesca soutamarina. Es à Juan-les-Pins, dame de proufoundoù de 4 à 10 m, qu’un mentounasc jouhe e spourtivou rempourtava ou « Championnat du monde de chasse sousmarine ». Dam’a soua balestra Tarzan, pervenìa à remountà 17 peishe (ço que fa 280 pounche) aloura qu’ou sen councurrent de Marselha, Falco, óutenìa soulament 234 pounche pèr pilhà a segounda piaça. Fra tout ço qu’ese stach pescà i eran : 2 lujherne de scuelh, de loubasse, de mùjari, de pourpre, pran de sare. Un autre mentounasc, Renoir, se classificava douziéme. Tout’u 63 councurrente venìan ben de dapertout dou moundou :d’ american, ome d’Egita, de Hawaï, ecc…
Un belou tìtoulou moundiale pèr noaishe Mentounasc !