Va fudula omudimba mombila noku u dula ouniform
Ovanambelewa vamwe mouninginino waKenya ova fudula mo olutu lomulumenhu umwe mombila noku mu dula oikutu younifoma oyo ya li a pakwa nayo.
Otaku hokololwa nakufya wedina Martin Shikuku Alukoye kwali a pakwa a djala omudjalo wa wana po woKakamega County Youth Service –etanga lovanyasha lopashitukulwa –konima eshi a xulifa kuyele omwedi ou. Alukoye (31) ota ku hokololwa a fila momeva.
Ovanambelewa mombelewa yopashitopolwa ova ka fudula mo
omudimba noku dula nakufya ou nonande va ilikanwa kovakwapata vaye opo shi haningwe.
Xekulu yaAlukoye okwati ovo ve shi ninga ina va ya ashike kondje yoveta yoshilongo ashike ova koola yoo eeveta dovakwamhungu.
“Eshi twa paka, otwe shi ninga mekwatafano nepangelo lopashitukulwa, no ina va anya nande eshi twa pula ngeno opo tu mu pake a djala oikutu yaye yoilonga,” Francis Mutamba ta ti.
Ovakwanedimo lanakufya ou omunamido 31, ta va ti ova anya okuyandja epitikilo opo nakufya wavo a fudulwe mo medu, ashike ovanambelewa ava ova ya komesho, ndele tave mu fudula mo no pehe na epitikilo lofamili ile ombapila ya dja komhangu.
Omuponhele welenga laItuti, Daniel Namayi, okwa handukifwa unene koshinima osho, nota ningi omatilifo kutya ota twala ovanambelewa ovo komhangu.
“Olutu lomunhu ngee ola pakwa omunhu okwa pumbiwa ombaapila yeenghono yomhangu ngeenge ope na ou a hala oku mu fudula mo. Ombelewa yopashitukulwa oyaya kondje yovete eshi ya ka fudula mo omunhu i mu dule oikutu oyo,” osho a lombwela oshikundaneki shoDaily Nation.
Ovakulunhu vepata lovaAbang’onya ova yemba oilonga oyo ya longwa kovanambelewa ava, tava ti oshi sha longwa po oshidila shoovene-vene.
“Otwa paka okaana ketu oufiku shaashi medimo letu omunhu ngee a fya omeva iha pakwa ku na etango. Ashike ovanambelewa ovo ove tu kumwifa eshi ve ya okufudula mo olutu lako shaashi vati ova hala oikutu yavo,” Mutamba ta ti.
Olutu ola li la dulwa ouniforma, ndele tali djalekwa oikutu imwe ipe, naashi osha ningwa komima eshi ofamili ya koshwanale, nokwa ningwa oinima aishe oyo hai ningwa konima yepako, ngee mepata omo mwa fya omunhu.