/Goagoseb a ekelahi omapopyo guulingilingi kombinga yaailongi yokoCuba
Omukalelipo gwaNamibia koCuba, Samuel /Goagoseb okwa li a ekelehi omapopyo kutya iipumbiwa ashike yaanasikola oohandimwe ya li ya faalelwa koHavana shaCuba kondhila yaSouth Africa oshiwike sha za ko. Ondhila yaSouth Africa Airways ndjoka yi li mewiliko lyepangelo lyaSouth Africa ndjoka oya li ya yi koshilongo hoka mEtitano. Sho a pulwa kuNamibia, South Africa okwa li a itaala okufaalela /Goagoseb, aakwashigwana yatano yaCuba, oondongelwa dhombelewa yomukalelipo gwaNamibia koCuba osho wo iipumbiwanima yaailongi 250 Aanamibia mboka taya ilongo koCuba.
Aailongi Aanambia oya kala taya nana nuudhigu okulanda iipumbiwa ya simana sho Cuba a pata muMaalitsa omvula ndjika, naashika osha eta iipumbiwa oyindji yi ninge ondilo nenge yi kale kaayi mo moshilongo shoka. Ombaapila ya li ya shangwa momasiku 06 Juli 2020 ndjoka ya ihanena omalungula otayi ti kutya aailongi ashike oohashikeshalye ya thika po nawa ya mona iipumbiwa yawo.
/Goagoseb mOmaandaha komushangwa gu uka kiikundaneki okwa ti omolwa ompumbwe yehala mondhila, oondjato odhindji dhaailongi kadha li tadhi gwana mo nodhindji odha li dha shunwa komapungulilo guuministeli wuuhaku.
Ombelewa yomukalelipo gwoshilongo otayi pandula South Africa Airways sho ya faalele oondongelwa dhombelwa yuunadiplomate ndhoka natango opo tadhi talwa nawa moCuba. Onkene omapopyo kutya oondjato ashike dhaailongi aashona dha thika kashi shi oshili,” ta ti ngaaka.
Omukalelipo shilongo ta ti natango otaya kala ya tala oshinima shika notaya tsikile okukwatathana noombelewa ndhoka opo oondjato dhaailongi dhi vule okuthika mbala.