APP kuna kuhundira mbunga zaSWAPO zitjide vakansela morwa komitiye zegendeso
RUNDU – Mbunga politika za ALL People’s Party kupitira mwahamutjangantoni gwazo Vincent Kanyetu kuna kuhundira mbunga politika zaSWAPO zitjide Verna Sinimbo ogu gakere nare asi mukurona godoropa ntani munona gwendi Ralf Ihemba morwa kunyoka mavango aga vavatumbwire mokukara mokomitiye zegendeso zodoropa zaRundu.
Ndango zodoropa zaRundu kapi zina kuyivhura hena mokuhorowora gumwe gwautatu akare silyo zokomitiye zegendeso kwedi oku kakupwire Ihemba kanyokere etumburo olyo asi akare silyo. Sinimbo nage kwanyokere mokukara mokomitiye ozo kwedi kwaMurongankuru, opo vakansela vahorowere Isak Kandingu asi yige mukurona nye godoropa, omu vapilire kusikisamo egano lyahamutjangantoni gombunga zaSWAPO Sophia Shaningwa omu gahere asi kwato malisinto nkenye naga horokapo. Toini Hausiku age kwamuhorowere asi yige nye nakara munona godoropa. Nampili ngomu yina kara asi vakansela modoropa zaRundu kuna kurugana, komitiye zegendeso simpe kuna kara zahana kusikiliramo. Pokatji kaSinimbo ndi Ihemba kwavandindilire asi gumwe gwawo akalipakerere kumwe naAnastasia Antonio ogu vatengwidilire mosirugana sendi asi munasipundi gokomitiye zegendeso kumwe nosilyo Mathews Wakudumo ogu ana kara asi age gombunga politika zaAPP. “Ngombunga politika, ose kuna kupa nye mbunga politika zaSWAPO kupitira mwahamutjangantoni ntani Ministera gonodoropa nekuliko nomukunda, Peya Mushelenga, novili 48 kutunda momandaha asi vatjide vakansela ava vavali vana pilire kuhara asi vakara mokomitiye zegendeso, Kanyetu yimo ngoso ana kutantera Nampa apa kava mupuragerere.
Hamutjangantoni gwaAPP katente asi nsene eyi vana kuyirugana, Sinimbo naIhemba vahepa kutunda momavango gawo morwa kapi nye vana kusikisamo etokoro lyokutunda kombunga zawo mopolitika. Hamutjanga gombunga zawo gomapukururo Hilma Nikanor kwatente mokwedi kwaNkurumuronga kwatente asi politika bureau kazitulirepo etokoro ndango zodoropa zaRundu zahepa kutwikira kugava yirugana yazo kovantu vatunga modoropa. Kanyetu katente asi navenye vavali Shaningwa naMushelenga awo kuna kuyilikida asi vamwe vanyenga kuza komeho omu vana kupira kutura vakansela ava asi vahepa kurugana ntani vaze mokomitiye zegendeso sina kara ngesi ukahe.
“Esi kuna kara sikando sokuhova tuna kumona kansela ana kunyoka ndi kupatanesa etokoro lyombunga zaSWAPO, zepeguru. Yipo nye asi ame kuna kuhundira nompitisili edi mbali ditundemo dene moyirugana eyi. Yimo ngoso ana kutanta Kanyetu. Age simpe kagwedereko asi ana kara noumbangi asi morwa sinke yina karere ngoso, ano nsene kapi vana kuyirugana usimbu age ngano tavatura poruzera Shaningwa naMushelenga. Apa nye katupulireko Mushelenga, age katente tupu asi ana pumbwa siruwo tanko atare asi yinke zina kutanta veta zokugendesa nondango donodoropa, atare asi ngapi omu ava horowora vakansela wovape. Ano Shaningwa age kapi nye katu mugwene nage alimburureko.