Ve li 58 va dipawa kodula yepoola moJapan
Odula yepoolela oyo ya loka mondingandinga yaJapan mEtitatu, oku niwe outile kutya otashi dulika ya dipaa ovanhu 58. Odula oyo ya tameka mOlomakaya kokanunu kaKyushu ndele tai kosho po ominghulo domilonga noikulundudu, osho sha eta opo omeva a kunguluke a yuka mouningininombuwanhu woshilongo. Ovanambelewa vonghalo yomhepo otava kunghilile kutya onghalo otashi dulika tai ka naipala shi dulife paife pondingandinga yoshilongo. “Unene oitukulwa oyo i shivike nale kutya oya nyika oshiponga ngeenge tashi ya kefundja, yo oi li moshiponga unene,” omunambelewa ta weda po. Ovanailonga vokuhupifa ovanhu ve li 80,000 ova twalwa nale keenhele odo da hepekwa nokonima otava ka waiminwa natango kovanashilonga vakwao ve li 10,000. Omupopiliko wepangelo Yoshihide Suga okwa ti ope na omafyo 53 a kolekwa, novanhu vatano ovo inava kolekwa okuniwe outile kutya navo ova fya. Ovanhu ve dulife po12 natango kave wetike, nepangelo otali konaakona omafyo ahamano a wedwa po oo nao taku fekelwa kutya okwa etifwa kodula oyo.
Moshitukulwa shaKyushu odula oya sheka, novakwashiwana ova tameka okushuna peenhele keshe shimwe osho sha li sha ningilwa omunyonena kodula.
Keisuke Masuda, omunamido 67 oo e li omukalimo womoshilando Hitoyoshi okwa lombwela oshikundaneki shoJiji ta ti okwa tala nehaluko nghene ekufikufi lomeva la dja momulonga waKuma la kungulula po omushiinda shaye.
“Okwa kungululwa po ashike momesho ange,” Masuda ta ti. Ta ti omukulupe oo okwa kala e likwatelela moshixwa fiyo omeva e mu dula eenghono. Ta ti ove mu tala ta molola omukulukadi waye pefimbo a li ta kungululwa po.
“Okwa li ashike nda tala ko, ndihe wete kutya nandi ninge ngahelipi,” ta ti ngaho.
Naomi Nishimura oo a kala moshilandopangelo okwa ti ovakulunhu vaye ova fya eshi va anya okufiya po eumbo lavo. “Nonande ovashiinda ova li ve uya noku ilikana ovadali vange opo tu tauke efundja, meme natate ova anya filu-filu,” omukainhu ou womunyasha ta ti manga a kengela omahodi. Etembu tali dengele ola li la kufwa po, opo keshe umwe a tembuke ile a ha tembuke ta longifa ehalo laye. Japan oku li mokati kokulombo oko nghee ku li haku etele oshilongo efundja nomakungululooukulundudu.Ovashinawa tava ti elunduluko longhalo yomhepo olo la etela oshilongo osho oudjuu. Momudo 2018 ovanhu ve dulife po 200 ova li va fila mefundja mouninginino waJapan.