Oveta moEgypt paife otai holeke oihakanwa yomahepeko opaixulo
Okabinete kaEgypt oka pitifa kutya oihakanwa moibofa yomahepeko oixulo paife otai kala tai holekwa nomadina ayo itaa kala vali taa yandjya mokati koshiwana ngaashi sha li nale.
Omadina oihakanwa otaa kala ashike taa yandjwa mohofa, komupanguli nokomukalelipo wovafekelwa, ngeenge sha pulwa.
Moshito oihakwanwa yomahepeko opaixulo moEgypt ohai fifwa ohoni nokutongolwa.
Oshinyangadalwa sho hashtag shokomalungula shi li melaka loshiArabic “Etameko lekondjelomanguluko lovakainhu” osha tameka netyapulo novanhu vahapu otava pula opo ovakainhu va manguluke oku eta pouyelele nghee va hepekwa.
Pefimbo opo tuu opo, omapopyo nomauliko ominwa okwa holoka eshi ovakaunhu vahapu va tofa mo ovalumenhu ovo tava ti ove va hepeka paixulo, naashi osha landula ekwatopo lomulumenhu omunafikola oo naye vati a kala nokuhepeka ovakainhu vahapu pamilele.
Omweeti woihokolola wepangelo okwa yandja ouyelele kepandja lokoFacebook momafiku aa kutya omunafikola oo okwa taalela oibofa yonghonga, oshihakanwa shaye shimwe okaana, oku ehameka kolutu naikwao vali imwe ya wedwa po.