Omalalakano oku eta po oikulya koNYS a fuula epangelo
OMALALAKANO oku tameka oku eta po noku longa omashini, epungu, ombelela, noikulya oinamwenyo okwa fuula ovakalelipo vepangelo ovo vali va ka talela po osenda yoNational Youth Service (NYS) koRietfontein mOshitopolwa shOtjozondjupa Region.
Osheendo osha li tashi talele po onhele oyo ili mopate yoB8 oyo ili pokati kaKombat noGrootfontein.
Osheendo osho sha li sha kwatelwa komesho shominista yovanyasha nomaudano, Agnes Tjongarero oo a li pamwe nomuponhele waye Emma Kantema-Gaomas oshali yoo sha kwatela mo minista welongo lopombada Itah Kandjii-Murangi osho yo omukanselile ta kwafele koNamibia University of Science and Technology (Nust), Dr. Andrew Niikondo.
Ovanambelewa ovakulunhu vomauministeli aeshe avali, oshoyo omunashipundi shokangudu tonateli koNYC Emma Leonard naCommissioner woNYS oo opo a ile koshipundi Dr. Felix Musukubili ovali yoo mosheendo osho.
Osheendo osha li sha talela po onhele ipe yaNYS naayo ikulu, oshoyo onhele yepangelo youngoba. MEtine osheendo eshi osha tala po oshiputudilo shopaungoba shikulu, onhele yoku longela omashini ikulu, ohele yoku wapalekela omeva, ohambo ili popepi oyo i na eengobe dili 150, osho yo eehecta dili 150 odo haku limwa epungu litoka nomwiidi woinamwenyo. Okulunhu woNYS Dr. Gabriel Hangara oo a yandja omauwa nomainda oo a taalela NYS okwa ti onhele oyo ya nuninwa oku longa omashini oya kala efimbo lile neenghono itai longifwa. “Onhele ei yomashini oya kala ashike opo, no ihai longifwa nonghalo yayo paife kai li vali nawa shaashi oya kulupa,” Hangara ta ti.
Okwa lombwela osheendo kutya NYS paife oku na elalakano nokwa tokola opo a longolole onhele oyo noku i nyumuna po opo ikwafele ovalihongi momadeulo avo, va kale noku longa omashini oo taa kala taa liwa mosenda, naao taa xupu po a kale taa landifwa keefikola dili momidingonoko da Grootfontein, Otavi noTsumeb. Ta ti NYS kumwe oku na eengobe dili 700 omo eengobe domashini doludi loBrown Swiss da teelela opo onhele yoku longela omashini i pwe oku wapaleka. Hangara ta weda po kutya NYS oku na edu leeheta 1 600 koRietfontein oko haku tetwa omwiidi weengobe nohau landifwa po keshe okapandi oke na N$500.
“Fiyo opapa otu na po oupandi veli 430. Notwa hala oku longa shi dulife po opo monakwiiwa opo tu ete po sha,” ta ti ngaho.
Konima yokuuda ngaha, Tjongarero okwa lombwela NYS opo a ha hepeke efimbo vali ashike na tameke oku kala endiki tali eta po sha lo tali li xupifa loovene paku longa oinima oyo ya popiwa kuHangara ya kwatela mo omashini omwiidi, noshotuu.
“Omu li omutumba koshipambaba shoshingoli noimaliwa. Omwa kala mwa teelela shike opo mu tule omadilaadilo aeshe oo moilonga?” KandjiiMurangi ta pula.
Oondohotola vavali, Niikonda naLeonard, navo yoo ova twa kumwe nomadilaadilo oominista, tava ti onakwiiwa yaNYS oi na etumwaumbwile, oku tala komalalakano mawa oo a tulwa po.