Esiku lyaantu ye na uulema lya dhimbulukiwa moWindhoek
ESIKU lyaantu taya lumbu nuulemba (National Disability Day), ndjoka shito hali dhimbulukiwa lwopuJuni naJuli, nuumvo olya li lya undulilwa komeho omolwa ombutoyoCovid-19, nolya tyapulwa mEtiyali moWindhoek.
Omupevi minista miipambele yaantu ye na uulema, Alexia ManombeNcube, ngoka oye a li omupopi a simana gwesiku okwa ti esiku otali dhimbulukiwa kohi yoshipalanyolo: “Okusa oshimbwiyu mokukwatela mo ayehe mekondjitho lyoCovid-19.”
Okwa pula okakomisi kelile po aantu ye na uulema moshilongo kedhina National Disability Council opo kase oshimpwiyu noku dhilaadhila shayooloka koshito opo omayakulo taga gandjwa ga kwatela mo aantu ayehe. “Ekwatelomo lyaayehe otashi ti kutya oto tyapula omauwanawa agehe ngaashi naanaa Aanamibia ayehe ye na, nenge kaaye na uulema. Nena onda hala okupandula ayehe ya kutha ombinga: omahangano, aanyanyudhi, aatoloki yelaka lyoshimbolo, naayehe mboka ya kutha ombinga noya si oshisho opo etumwalaka ndika li thike kukehe omuntu e na uulema moshilongo,” Manombe-Ncube ta ti. Ta ti etaandalo lyombuto olya kwata kehe gumwe, mwa kwatela aanuulema mboka kwa talika kutya yo oye li mongundu yaantu yeli moshiponga ngele ya kwatwa koCovid-19. Ta pula Aanamibia ayehe, unene aantu taya lumbu nuulema opo ya ikwate nawa ya ndalapatele uukolele noku yanda opo kaa ya kwatwe kombuto ndjoka.
“OCovid-19 ohayi dhipaga, ngaashi naanaa twa mona omaso ogendji ga etithwa kombuto ndjoka. Alikana ikwateni nawa. I yoge ni koonyala, ne mu igwayeke oosanitisa, yandeni omangundumano, kaleni momagumbo. Shika oshili muuwanawe weni mwene, nogwoshilongo,” Manombe-Ncube ta ti.