Sipolopela sene sifufa kisa muuso
OMUTHIYA – Sipolopela sene sibonwi sifufela fakaufi mabapa ni museto wanaha Namibia ni Botswana mwamazazi afelile, neli sa liluko la silalanda isi sisole sanaha Botswana, sina mone kubulelelwa famakepe asicaba. Taba yeo ne nyatezwi kimuzamaisi mwa liluko mwasikiliti sa Zambezi Morgan
Saisai, yana ize babeleki ba liluko neba sebelisa sipolopela kubala lifolofolo ni kupenda litou. “Nina neni lizelizwe ki banaha Botswana bane ba buza kuamana ni sipolopela, kono neni balemusize kuli liluko neli patehile ni palo ya litabula ni kupenda litou mwalibaka za Kwando, Linyanti, Lisa la Lyambezi, Chobe ni masa a Zambezi,” nekutolokile Saisai.
Naekelize kuli kalulo yeo nekalile kale mi nefelile Labubeli. “Kacwalo, nihupula kuli sicaba neba lyanganisizwe kitaba yeo,” nabulezi. Saisai naize liluko neli bala kakuli kinako ya kututa kwa lifolofolo sina halizwa mwalibaka ze patami kuya kwa libaka zelumbile pula haisutelezi. “Luezanga taba yeo nako ye ya silimo, kakuli litou lizwa kwa libaka za sileze kutaha kwa mushabati. Kacwalo, luna ni kuli penda kuli lubone koliya, kakuli likona kuba kolilata nako ifi ni ifi. Taba yeo iyandululwa ki kikututa kwa lifolofolo kuzwelela mwanaha Botswana, Zambia ni Angola,” nabulezi. Sabo ya sicaba kuamana ni sipolopela netile kasamulaho akubulawa kwa batu babane balubasi lulu liñwi, ki masole banaha Botswana hane basweli kuyamba. Bane bashwile neli mandui mi neba swelwi ni kukunupwa ki masole banaha Botswana Labune viki yefelile.