Oookaume kaGinimbi veli yambela efudiko laMoana

Ookaume kanakufya Genius Kadungure a shivika nedina Ginimbi, ove li yamba oku yandja omayambidido kofamili yaMitchell Moana Amuli opo i dule oku mu paka.

MEtivali, ookaume ava ova yandja oikulya noshimaliwa shifike poUS$3000 (N$46 000) kovakwa Amuli ovo va ongala keumbo laMoana koHighfield.

Ovo va yandja ova kwatela mo Chief Jose, Chief Albert, Brian Nyanyiwa, Ronald Muzambe, Dino Tumbare naBrighton Bako.

Omitima daava oda enda konima eshi va mona eindilo la dja ku kahewa kaMoana oo a li ta ehela ponhele yofamili kosocial media opo ku yandjwe omayambidido opashimaliwa noikulya kofamili yaMoana oyo yali ihe wete kutya ota iningi ngahelipi opo ipake.

Moana pamwe naGinimbi nookaume kavo vavali, Karim Cazal, Omumalawi omuuliki woikutu a yambukile koMozambican, Alichia Adams ova xifila moshiponga Osoondaxa yoshivike shadja ko pefimbo vali tava di konhele yomalihafifo yaGinimbi yedina Dreams Club oko kwali tava tyapula edalo laMoana eshi a wanifa omido 26.

Ava vane ova dja mo mocluba pamwe noku londa mohauto yaGinimbi keengulasha dOsoondaxa, ashike ina va fika oko vali tava i.

Ohauto yavo oya kandomena mopate yedina Borrowdale road konima eshi Ginimbi oo a li ta shingi eli denga omutwe nomutwe mokatuwa koka Honda Fit kwali taka di komesho. Otaku hokololwa omulumenhu ou woshipuna a li ta kendabala okupita pomunghulo ohatu oyo a li a landula, nomupya munene okwe ke li denga mokatuwa oko kali taka di komesho, osho sha etifa ohauto yaye i alangate noku yaka omundilo.

Ginimbi ye okwa li a nanwa mo mohauto omanga ina i yaka omundilo, ashike Moana nookaume kaye ina va dula oku kufwa mo shaashi ohauto oya yaka omundilo omanga osho ina shi ningwa. Ova pila mo mohauto, nota ku hokololwa omalutu a vo a pyapo filu filu itaa dulu oku dimbululwa.

Omapako avo inaa ningwa natango shaashi opolifi natango opo tai ningi omakonaakono oku va tongolola.

Ginimbi ye okwa pakwa mOlomakaya kovanhu vahapu taku tengenekwa ve dulife po3000.