News New in Khoekhoegowab Kho and Oshiwambo Osh (Kundana) (Kun

D irekter xenerali, !Hū!nāsi ǀAweǁguib ôa!nâ!nans dib, Obeth Kandjozeb ge ǁîb di ǂkhîba gere gowaǂui ǀnîkhami kō skolgu Erongo ǀkharib !nâ hâgu tawa a ǁaxūhe projekdi ra ai!gû ǀgaub ǂnamipe.

Kandjozeb ge ai!â gere ǂoa wekheb ai Erongob skolgu !nâ a ǀhawe-ūhe skolga !gâi!gâis tsî ǀasa !âga ǂnuwis projekdi ai!gûsa gere !hara.

Nē projekdi ǁgūbas ge ǂhanub xa Covid-19 ǂgaoǀkhāsi ai oe-ams, skolǀgôan ûigu !norasasib tsî ǂurusiba ǁawoǁawos ase hâ.

Tsoaxubams !nâb ge Kandjozeba, Tamariskia ǂAm Skoli tsî Vrede Rede ǂAm Skoli hâkha ge sari hâ i, ǁnāpa in ǀasa ǂkhari-omde ombahe tsî ǀoro !âga gere !gâi!gâi!nâbahese.

ǁKhātib ge House Namib Hostels tsîna Swakopmund Sekondere Skoli tawa ge sari hâ i.

Erongo ǀkharisi ǁgau!nâs direktorats ge N$36 miljun marisa Covid-19 ǂgaoǀkhādi ai oe-ams ase ge ǂnûiǂuibahe.

Erongob !nâ ge ǂhâǂhâsasib !oagu mâisaoguhe hâ i 53 skolga xu gu ge 24 skolga ǀasa ǂkhari-omdi ǂhâsiba ūhâ, 18 skolgu ǁîgu ǀoro ǂkhari-omde nî !gâi!gâi!nâbahese, koro skolgu di hosteldi nî !gâi!gâi!nâhe tsî khoese skolgu ǁîgu sâi!nâ!nā-omdi sîsenūxūn nî dī-ūnuhe tamas ka io ǁkhawa !gâi!gâihesa ra ǂhâbase.

Nausas, direktoratsa !gâi aiǁgausa projekdi ǀkha ra ǁgau, ǀgamra ǀnai dītoahe hâse xawes ge ǀkharisi direkters Erenfried Stephanusa gere ǁgui!ā, ǁîn ge ǀgaisa ǁgoaǂuide ūhâ isa xūna ǁamaǂgans ge !onkhao Covid-19 !nau-amdi !aromase.

!Nubusib ǁgam-i dib ǀnî !garo!ā !âgu !nâb tsîn ge khaohâs projekdi disa ra !aroma. Ai!âb ge Kandjozeba, Dībasen Junior Sekondere Skoli di hostels !gâi!gâi!nâdi tsî ǀasa ǀawa!namn beros ra omhe !khaib tsîna ǀÂǂgomes !nâ ge sari hâ i.

ǁKhātib ge Omatjetes !nâs tsîna ǀasa ǀawa!namn beros ra ai!gû ǀgauba gere !hara.Kandjozeb ge ǁgau!nâs direktorats, Stephanus ǂgaeǂguis !naka hâsa ǀgaisa koasa ge mā,!ā!nāsi sâuǁkhāsib ǀomkhâisa ǂkhâ!nâs !aroma, ǀnî omūxūn ge Namibiab !nâ aitsama ra kuruhe xū-i amaga.

Okongue ǂAm Skolab ge ǀgawasa ra ūǁnâba, ǁîn ge !ā!nāsi kuru-aob xa skoli tawa ǂnuwiǀuide gere ombahe tsî ǁnās !nâū ǀhûhâsib tsîna a ǂkhâ!nâsa sîsenǂnuwibas ǀkha.

ǁKhātis ge Stephanusa ǁîs ǂgaeǂguis ǀkha koasa ge !khō!oa, mâǂoa ra ǂâiǀgaub hîan ge ǀnî ǂnûiǂuisa marina, ǀnî skolgu hosteldi ǂûsâi!nâ-omgu huisenxūna !gâi!gâi!nâ tamas ka io ǀasan ǀkha a !khō!khunis ǀgaub !aroma.

Kandjozeb ge ǁaeba ǂnûiǂui tsî ǀhûhâsigu tsîn ǀkha ǂnûde gere ūhâ, ǁîn ǂâiǂhansendi ǂnamipe, skola i ga tsâǀkhā tama is tsîna.

!Gomsigu hîa sao ra !âgu Omatjetes, Okongues tsî Otjohorongos !nâ gere ǂoaxagu ge !nubusib ǁgam-i tsî !nanǀgaib dib tsî khoen tsî !aubǀgurun ǁaegu ra hâ !omgudi tsîna.