Nguuru gomomukunda Zambezi kahundilire vatungimo guvadame
Nguuru gomukunda Zambezi Lawrence Sampofu kahundilire vatungimo guvadame nokuhundira vantu asi vahaligusira veta pwavene morwa kudipaga vawo ava kavazire vakahuge kumwe nokuvadipaga vakwayita vaBotswana Defence Force (BDF).
Sampofu, ogu kahuyungire posiruwo sediworoko kwava vane kavadipagere morwa kukahuga nomfi ntani zinya gowo kavadipagere modoropa zaKatima Mulilo mosondaha, katanterere vana kulira asi mapangero aga gavali kuna kurugana ko Yuma kosihorokwa sangesi.
‘’twaha tarererani magano getu gehandu gatupangere mokuzonagwisa mukaro gomuwa ogu twakara nago ngoyiorongo yivali.
Twahepa kupa epangero liruganeko Yuma korunyegenyo rwetu oru tuna gava yipo epangero ;likare nosiruwo sokuyirugana.
Ame kuna kumupa mukumo asi epangero kunakurugana paaapa lyahulira mokuretesapo ehagero komukaro gwangesi ogu tuna kara nago pwantani.
Twahepa tupu kukara asi gutudame, nokukwata nomutjima omu tuna kundindira epangero lyetu litupe elimburururo,’’ yimo ana kutanta ngoso Sampofu.
Ehoreko lyovamati vavali ava kavaroyere vakwayita vaBotswana morwa kukahuga nomfi konyara sivike sina pitipo, ntani zinyawo gokuvareta, talikarako nayina pevango lyaImpalila Island.
Vanakufa ava vatatu, Tommy ( 48) Martin (40) ntani Wamunyima Nchindo (36) ntani sipwa sawo Sinvula Muyene (44) navenye owo kwavaroyere vakwayita vaBDF momazuva 5 November konontere domukuro gwaChobe.
Mukurwa nakufa ozina vamati, Alphonsina Nkungano Mubu (69) nage kafire mouvali omu vana kumugazaraera asi kafire komutijma kagusitopere.
Sampofu kageve mukumo kwava dinagumu nomfa novaNamibia navenye asi kulira kwetu vanatuzuvhu.
Age yipo katente asi moNamibia nkenye gumwe gakara nouhuyungiro wendi kupitira mediveta mokuponga pevango nompora ntani kwahana yirwiso nkenye.
Yipo nye asi katente asi, epongo lyangoso lyahepa kukara asi kuna kutara noveta depangero nokuwapukurura eparu lyawo.
“Ose tuna gwana vana vetu ava kavadipagere twahepa nye kukara nomukaro guna wapa mokulifumadeka yipo tuka kare nehoreko lina wapa kovakuru vetu ava.
‘’ Moomu tupu yina kara asi marongikido gehoreko kuna kuza komeho, uhudi limwe tali horoka hena omu zinya vana owo nage kadogorokere, morwa mutjima gwendi kapi kagugutambwire mokuzumbanesa vana vendi navenye posiruwo simwe tupu.
Vantu muna kulira vetweni, nonkango delika kapi tadivatere, mokuzumbanesa unene ngesi moomu yina horoka, yimo ana kutanta.
‘’ Nonkango detu nomakanderere kuna kara none mosiruwo esi sosidigu.
Esi yiso nye siruwo asi kara asi nonkango dokuhuyunga muntu kapi navadimona mulyo unene komuntu ogu dina gumu nomfa dangesi.