Kamala Harris: Facebook a dhima ko omishangwa dhokatongo kopalwaala kombinga yomupevi-ulikwapresidente gwa-US
Facebook oya dhima ko omishangwa dhokatongotongo kopalwaala osho wo uutondwe waakiintu, osho wo ookomenda dha nuninwa omupevipresidente gwaUS Kamala Harris. Shika osha li sha ningwa konima sho BBC ya li ya yakele koFacebook kombinga yoongundu ndatu ndhoka hadhi ningi omapopyo guutondwe kompandja gawo. Ongundu yimwe yokukondolola iikundaneki oya ti epandja ndyoka olya kala nokushanga iinima ya nika okatongotongo osho wo uutondwe waakiintu.
Nonando omapandja ngoka ohage shi ningi omukalondjigilile oku ula nayi omupevipresidente, Facebook okwa ti it aka kuthila ongundu ndjika omnkatu. Omupresidente gwoMedia Matters Angelo Carusone okwa ti: “Facebook sho a kutha ko omishangwa ndhoka konima owala sho a lopotelwa otashi ulike kutya oompango dhawo odha weya na ihaya itula mo oku dhi gwanitha po. “Otatu popi oshinima shi iwitikile, ashike Facebook ine shi mona sigo ta lopotelwa kaantu yalwe.”
Epandja olyi na omishangwa kutya Harris ke shi omukwashigwana gwa-USA, oshoka yina okwa za koIndia nahe okwa za koJamaica. Omanga gumwe a ti anuwa ke shi omuluudhe nawa a kalele po ongundu yoDemocrats.
Omanga gulwe a tin a shunithwe koIndia. Okwa kala wo kun a uuthano uuwinayi tawu mu sheke. Epandja limwe olyi na iilyo 4 000 omanga ekwawo lyi na iilyo 1 200. Omwa kala wo mu na iinyolwa tayi sheke shin a sha nuukashikekookantu noya nika iihulo, nayo mbyoka oya li wo ya kuthwa ko. Facebook okwa kala nokupewa uusama koongundu dhuuthemba womuntu sho ihaa itula mo okukondjitha iinyolwa tayi eta uutondwe. MuAguste, ookampani omathele odha li dha hulitha po okulongitha omayakulo gokutseyitha oongeshefa dhawo naFcaebook.
Monakuziwa, aahwahwameki yalwe oya li ya lombwele o-BBC kutya okatongotongo kopalwaala okapi osho wo omipopyo dhuutondwe ihadhi dhimbululwa kiikwa niipangitho yoFacebook, nomoompiti dhilwe ohayi tumbalekwa nokuli.
Rishad Robinson, gwehangano lyoStop Hate for Profit okwa lombwele BBC ta ti facebook okwe ya po nomukalo gwokupandula mboka taya andjaganeke omipopyo dhuutondwe.
Os h iwike sha za ko, gumwe gwomaayambidhidhi yaBiden okwa li a ponokele Facebook omolwa omukalo ha longitha ngele tashi ya komipopyo dhiifundja sha landula omahogololo gomo-US.
Uudemokoli wetu owu li moshiponga, osho Bill Russo, a li a ti ngaaka. Russo oye amushanga gwopevi gwiikundaneki gwaJoe Biden.