Papa Bouba Diop: Senegal a thindikila ependa lyokatanga kokoompadhi
Omudhani omukulu gwaSenegal Papa Bouba Diop, ngoka a si oshiwike sha za ko moFrance mepipi lyomimvo 42, okwa fumvikwa moshitopolwa moka a valelwa popepi noDakar. MEtitano, omupresidente Macky Sall okwa li a kwatele komeho omatumbaleko ge, ta ti oshigwana osha kanitha ependa.
Diop okwa li a tula mo okoola muudhano wawo naFrance kekopi lyuuyuni mo2002 ndjoka ya li ya mono Senegal a dhenge enyakwa lyuuyuni ethimbo ndyoka. Oyendji yomaadhani pamwe naye aakulu, oya li ya yi kefumvikom lye mEtitano noya li taya monika ya nika oluhodhi noonkondo.
Oya li ya zala uumbindja wosipana yopashigwana wu na edhina lye, nonomola ye, 19, pombunda.
Omudhani gwokomeho El Hadji Diouf okwa ti Diop okwa li oshiholelwa oshiwanawa, omanga Henri Camara okwa ti okwa kanitha omukwanambwiyu
gwe. Olutu lwaDiop olwa li lwe ya nondhila okuza moLens, muumbangalantu waFrance, moka a sila konima yuuwehame uule.
Presidente Sall okwa li a ti okoola yaDiop naFrance otayi kala nokudhimbulukwa ethimbo nuule mokatanga kokoompadhi muuyuni.Konima sho ya dhenge France, Senegal okwa tsikile nondjila ye noku ka thika kedhingoloko lyoosipana hetatu dhahugunina. Kape na osipana yaAfrica ya pita po mpoka.
Presidente okwa li a tseyitha kutya omisiuma tayi tungwa mokapale haka gwana aantu 50 000 ndjoka tayi tungwa pondje yoshilandopangelo Dakar, otayi ka lukilwa Diop, ngoka wo a li a pewa oshishani.
Okwa li a sindana ekopi lyo-FA Cup mo2008 noPortsmouth. Okwa dhanene wo oosipana dhoFulham, West Ham United, Birmingham City nosipana yaFrance, Lens.
Omudheuli gwe omukulu koPortsmouth oshiwike sha za ko okwa li a lombwele oBBC kutya “oye omunelago okukala a wilika okamati haka.”
“Oya li haye mu ithana osikopa, oshoka okwa li omunene na ito mu undula,” ta ti ngaaka.