Iiningwanima yeyelu yi vulithe 40 ya lopotwa moWindhoek

Elelo lyoshilando shaWindhoek olya lopotelwa iipotha 42 yaantu nenge omahala ga yelulwa pokati komasiku 30 Deseba 2020 no 13 Januali 2021.

Omupopiliko gweleelo Lydia Amutenya momushangwa ngoka a tumu kiikundaneki mEtitano okwati aakalaimo yomomahala ngoka ga yelulwa oya pula elelo li pombe mo omeya momahala gwawo, nenge li patulule omikanka nominino dhoka hadhi matuka omeya noku opaleka omilamba dhoka dhina iinima mbyoka ya tayi imbi omeya opo ga matuke nawa nota yi eta omeya ga lundalale noku yelula omalukalwa gawo.

Ta ti eyelu ndjoka olya etela omahala ogendji moshilando ngaashi otungo noopate dhiteke po, ashike elago enene, kape na nande omuntu

gumwe a monithwa oshiponga nenge a sa omolwa ekunguluko lyomeya.

“Olopota ndjoka tu na otayi ulike kutya moshikandjo hogololo shaSamora Machel omwa dhidhilikwa omagumbo geli 71 ngoka geli moshiponga oshoka oga tungwa momilamba. Momalukanda ngoka inaa ga longekidhwa moshitopolwa shoWindhoek yokuushayi moo omwa monika omagumbo 91 geli monkalo ya nika oshiponga, nooyene yomagumbo ngoka oya pulwa opo ya ze mo momathilu noku ka tungila komahala ngoka ga londa.

Omvula ndjoka oya kala noku loka moWindhoek uupokati wo45 no60 okudja mesiku 30 Deseba 2020 no 13 Januali 2021. “Nandi popye mpaka kutya otu li owala petameko lyomvula onkene otatu ka vula owala oku mona kutya uushada wa longelwa omatungo gopaumwene nogoshigwana ogu thike peni pehulilo lyokulombo. Elelo otali tsikile noku gandja omakunkilolo nosho wo oku popya naantu mboka ya gumwa nenge taya ka yelulwa. Aantu oya pumbwa wo oku ikwatha yo yene noku tula ooshako dhomavi mpoka tapu panukile omeya. –Nampa