Otashi vulika eliko lyaMyanmar lyi nkundipale
AATSEYINAWA nooyene yoongeshefa otaya tengeneke kutya okuu yomoMyanmar otashi vulika yi ka yonagule eliko lyoshilongo. Ookampani tadhi ti okuu oya umbila nale omangeshegelo gopaigwana momeya. USA okwa tseyitha nale kutya ota dhiladhila okutula po oondjindikila dha gwedhwa po moMyanmar, oshilongo shoka osho shimw shomiilongo ya heap noonkondo moshitopolwa. Ashike oondjindikila dha-USA itadhi ka yaga kegonga unene oshoka omangeshefelo ogendji moshilongo shoka ohaga zi moAsia. Shi ikwatelela kOmbaanga yuuyuni, Singapore oye omunangeshefa omunene moMyanmar okuza omvula ya za ko, e na mo oopelesenda dhomangeshefelo ga pitikwa ge li 35%. Hong Kong oku li puutuyali noopelesenda 26. Vriens & Partners ehangano lyepangelo ndyoka ngashiingeyi tali tonatele omangeshefelo gooprojeka dhongushu yoodola oobiliona 3-4 yaakwiilongo mboka taya ngeshefa moMyanmar. Okuu oya li ya holoka sho etanga lyopakwiita lyaMyanmar olya kutha ko oshilongo konima sho ya manga po omuleli Aung San Suu Kyi pamwe naapapolitika yalwe koongulasha dhOmaandaha. OTV yetanga lyopakwiita osho ya tseyitha kutya oshilongo oshi li melelo lyomeendelelo uule womvula ayihe noonkondo otadhi ka taambathanwa mule wethimbo ndyoka. Okuu oye ya konima yokwaatsa kumwe kwa holoka pokati kepangelo nomilitali sha landula omahogololo.
Myanmar, shoka sha tseyika wo nedhina Burma, osha kala nokulelwa komilitali sigo elundululo lyuudemokoli tali landula ko mo2011.
MOmaandaha, omilitali oya ti otayi ka gandja oonkondo kukakukutu komatanga Min Aung Hlaing omolwa eyako lyomahogololo. Aakwiita oye li taya patolola omapandaanda goshilandopangelo Nay Pyi Taw osho wo oshilando shilwe oshinene, Yangon. Momahogololo gaNovemba, ongundu yaSuu Kyi yedhina National League for Democracy (NLD) oya li ya sindana iipundi ya gwana okutota epangelo. Omakwatathano gopangodhi osho wo omayakulu galwe gopangodhi oga yiwa moshipala miilando yilwe iinene, omanga oTV yopashigwana yo-MRTV ya ti oyi na omaupyakadhi tage yi imbi okuya mombepo. Omakwatathano naNay Pyi Taw kage po noshidhigu okumona lela kutya oshike tashi ningwa po.
Moshilando shoka oshinene sha li nale oshilandopangelo, Yangon, omakwatathano gopaintaneta osho wo goongodhi oga nkundipala, naayakuli oyendji oya tetula omayakulo gawo. BBC World News osho wo iikundaneki yilwe yopaigwana oya indikwa, omanga iitaasi yiikundaneki yomoshilongo ya kuthwa mo mombepo. Aantu oyendji oya monika ye li momikweyo puushina wokunana iimaliwa moYangon nopwa tegelelwa pu kale pen a ompumbwe onene yoshimaliwa koomuma omasiku twa taalela. Oombaanga odha hulitha po omayakulo gadho agehe manga, shi ikwatelela kuuyelele wo Myanmar Banks Association.