Okuu yomoMyanmar: Ohonde ya tika
Opolisi moMyanmar oya umbu ooholo mokati kaahololimadhiladhilo, noya dhipaga konyala aantu omugoyi.
Omaso ngoka oga lopotwa moYangon, Dawei nomoMandalay, moka anuwa opolisi ya longitha ooholo dhina omwenyo, omakenya nomiku dhomahodhi.
Aakwiita oya tameke uuhwapindi mbukwa konima yiiwike sho aakwashikwana ya kala taya holola omadhilaadhilo oku za mesiku lyo1 Febuluali nuumvo.
Aaleli yepangelo, mwa kwatelwa goka a li omutse, Aung San Suu Kyi oya li ya ningilwa okuu noku umbwa ko koshipundi.
Omathano nuuviideo wa holoka komalungula Olyomakaya oga ulike aakwashigwana taya matuka po aa polisi mboka yali ya dhika omainda gomoondjila, nomokati kaakwashigwana mboka omwali yamwe ya tiligana oombinzi noonkondo.
Omiyonena tadhi ningilwa aakwashigwana komatanga gepangelo odha tsikile nomOsoondaha moka aaleli yokuu mboka yali ya tokola oku mweneke aakwashigwana ayehe mboka ye li ompinge nayo notaya holola omadhilaadhilo.
Omutse gwaMyanmar ngoka a umbwa ko koshipundi okwa ningi ethimbo nuule inaa monika oku za pethimbo ali a umbwa ko koshipundi noku tulwa mondjedhililo moshilando pangelo Nay Pyi Ta.
Aayambidhidhi ye niigwana oyindji oya kala noku kondjitha opo a mangululwe, ko ku longithwe iizemo yomahogololo ga ningilwe muNovemba mbyoka yali ya ulike kutya ongudu yaSuu Kyi ndjoka ya sindana omahogololo nomawi ogendji.
Suu Kyi okwa tegelelwa opo a holoke mompangu nena ta pangulwa sho anuwa a adhika noongodhi dhuuhokitoki inaadhi nyolithwa momalungula gomoshilongo noku ya kondje yomilandu dhocoronavirus. Ashike aakalelipo ye yopaveta inaya vula oku popya naye pethimbo eli mondjedhililo.
Aaleli yetanga lyegameno mboka ya ningi okuu otaya ti oya umbu ko epangelo koshipundi omolwa uulingilingi wa longitwa momahogololo, ashike okakomisi komahogololo oka ti dhoka odha nakalindi.
Okuu ndjika oya yembwa kuuyuni, naashika osha eta nokuli oondjayi dhomatanga dhoka dhi lile okuu ndjoka komeho opo dhi tulilwe po oondjindikila.