Ye vule po400 000 oya li ya dhengwa kondjala mo2020
AANAMIBIA ye vule po400 000 oya li ya dhengwa kondajala omumvo gwa yi. Ndhoka odha popiwa komukuluntuwiliki mombelewa yomupilima I-Ben Nashandi, esiku omandiki ga yooloka ga li ga gongala pamwe okukundathana nkene ye na okukandula po ondjala moshilongo.
Omaupyakadhi ngoka okwa li taga kundathanwa kaanambelewa ya za kuuministeli wuunamapya, uuministeli wuundjolowele nonkalonawa, uumiisteli wekandulepo lyoluhepo osho wo ehangano lyuundjolowele muuyuni.
“Omawupyakadhi ngoka ohaga dhenge kiitopolwa inaayi mona omuloka gwa gwana oshowo kiitopolwa ku na aantu taya mono iihuna,” ta ti ngaaka.
Okwa totha mo iitopolwa ngaashi Kunene, hoka kwa ningi oomvula dhi li heyali itaaku mono omulokwa gwa gwana.
Ta ti, ombinga yimwe yoshitopolwa shErongo no mbinga yimwe yoshitopolwa shaMusati, ihayi mono omulokwa gwa gwana.
Okwa popi ta ti, otaya kumagidha aanafaalama opo ya tsikile okulonga nuudhiginini opo yi ikuthe monkalo yondjala.
“Pethimbo ndika itatu vulu okugandja omwaalu gwaantu ya dhengwa kondjala oshoka omvula inayi mana okuloka. Nonande koombinga dhokuuninginino okwa lopotwa ku na nale iimuna tayi si kondjala,” ta ti ngaaka.
Punaye Havarua omukalimo gwomOpuwo moonkundathana dhopangodhi naKundana okwa ti, kehe esiku otaya kanitha iimuna.
“Tse omuhoko gwetu ogwa ikolelela miimuna, nuuna twa hala oshimaliwa ohatu landitha po iimuna yetu, ngele twa si ondjala ohatu dhipaga oshimuna e tatu li, nena iimuna yetu otayi si po kondjala,” Havarua ta popi ta nyenyeta.
Ta ti, epangelo nali yambidhidhidhe meendelelo, oshoka otaya ka mona iihuna ngele iimuna yawo oya si po ayihe ngaaashi momumvo 2019.
“Aakuluntu yetu itaya kotha we, oshoka oya sholola kutya omvula itayi ya ngaashi shito. Otatu ka mona ashike tu li mokati komvula, omvula inaayi loka, otu li nale muMaalitsa ihe egulu itali ulike omandhindhiliko gwomvula,” Havarua ta popi ngaaka.
Ta ti, ota indile peha lyaakalimo yomoshitopolwa shaKunene ashihe, opo epangelo lyi ya yambidhidhidhe mbala omanga iimuna yawo inaayi sa po ayihe.