UN a londodha Tanzania kaa tinde oontauki dhaMozambique
IIGWANAHANGANO (UN) oya tseyitha kutya oya mona olopota tayi limbilike tayi ti Tanzania okwa tindi oku taamba aantu ye vule po1000 taya kongo uuholameno sho ya yi ontuku iiponokela ya ningwa koIslamic
State mondoolopa yi li muumbugantu waMozambique, ehangano lyetonatelo lyoontauki lyIigwanahangano- UNHCR osho lya ti ngaaka mEtiyali.
Iiponokela mbyoka ya ningwa momasiku 24 Maalitsa mondoolopa yaPalma, ndjoka yi li ontega nomina yoshimoko shomuku gwopaushitwe yongushu yoobiliona US$60, oya li ya halakanitha aakalimo yomondoolopa moka, yamwe ya ka holama mokuti omanga yamwe ya fadhuka po noombautu. Yamwe oya thindi muumbugantu ya uka moTanzania.
“Oosipana dhoUNHCR…oyapewaoolopota tadhi tilitha kaantu mboka ya tauka ye vule po1 000 taya thigi po Mozambique notaya kambadhala okuya moTanzania ashike inaya pitikwa okutaaguluka oongamba,” osho UNHCR a ti ngaaka momushangwa. “UNHCR ota pula aashiinda yaMozambique ya gandje omakwatho noku egulula omiyelo nokulandula omilandu dhokukonga uupongekwa kaantu mboka ya pumbwa egameno sho ya fadhuka po iikolokosha,” tali ti ngaaka. Palma oku li popepi noongamba dhaMozambique naTanzania. UNHCR kuyele oya li ya lombwele Reuters kutya itayi vulu okuya koongamba, ashike inapa gandjwa etompelo. Aanambelewa yaTanzania inaya vula okuningwa nayo ekwatatahno ya tye ko sha koshinima shika.
Oshiwike sha za ko, ombautu ya humbata aantu 45 taya tauka Mozambique oya li ya tula moTanzania, moka omuleli gumwe gwomoshitopolwa a ti otaye ya pe iikulya nomilalo. UNHCR ta ti iiponokela moPalma oya thiminika aantu 11 000 ya ye ontuku nokuthgiga po oshitopolwa, naantu omayovi natango taku popiwa ya patekena moka. Etanga lyegameno olya ti moPalma ngashiingeyi omu na egameno lyothaathaa.