Botswana ta konaakona omaso gaantu ya si konima yetuntilo lyoCovid-19
BOTSWANA ota konaakona omaso gaantu yaali mokati kaantu omayovi mboka ya tuntilwa etuntilo lyoCovid-19 nomuti gwoAstraZeneca opo ku konaakonwe ngele ope na ekwatathano, uuministeli wuuhaku tau ti ngaaka.
Oshilongo shika shokuumbangalantu waAfrica sigo oompaka osha gandja omata 31 000 gomuti gwoAstraZeneca, ogwo ashike omuti gwetuntilo gwa longithwa moshilongo moka. India okwa li a gandja omata ge li 30 000 ngoka ga ndulukwa po kehangano lyoSerum Institute of India (SII), naBotswana okwa li a landa omata 33 000 ngoka ga longwa moSouth Korea moshikonga shokuandjaganeka omuti gwetuntilo shedhina Covax. Aantu yaali mboka ya hulitha oya li ya tuntilwa nomuti ngoka gwa longwa moIndia.
AstraZeneca ina yamukula komapulo ngoka a pulwa koshikundaneki shoReuters. Uuministeli wuuhaku waBotswana inau fatulula nkene aantu mbaka ya si.
Omata getuntilo oomiliona goAstraZeneca oga longithwa muuyuni awuhe. Ehangano lyoEuropean Medicines Agency (EMA) olya li lya mono olopota yiipotha yontumba yombinzi tayi oto kuyele muApiilili, konima sho omata ga adha poomiliona 34 ga li ga longithwa, osho Sabine Straus ngoka e li omunashipundi gwokomitiye yegameno yo-EMA a ti ngaaka.
Onkalo ndjoka yombinzi tayi oto oyi li unene maakiintu ye li kohi yoomvula 60. Uuministeli wuuhaku waBotswana momushangwapitithi mOsoondaha owa ti omaso ngaka oga li gaakokele. Inawu gwedha po we uuyelele wulwe. Omuti nguka gwoAstraZeneca ogwa longwa moIndia notagu andjaganekwa kohi yedhina Covishield.
“Uuministeli oshinima shika owe shi gandja momake gehangano etonateli lyomitiBotswana Medicines Regulatory Authorirty (BOMRA) lyi ninge omakonaakono. Okwa tegelelwa BOMRA ota ka nonga omakonaakono ngoka tag aka tala osheetithi shomaso ngaka gaali noku tala ngele oge na ekwatatahano nomniti dhetuntilo lyoCovid,” omushangwa tagu fatulula ngaaka.
Olya li wo lya pula oshigwana shi kale sha ngungumana nolya pula aantu mboka taya aluka komikithi ya tegelele manga ihe inaya tuntilwa paife.
Omakonaakono gaBotswana oge ya konima sho ehangano lyokutonatela omiti moEurope lya ti olya mo nape na ekwatathano pokati komuti gwoAstraZeneca osho wo ombinzi tayi oto.
Aatseyinawa oya ti, nonande pe na ekwatathano pokati komuti nombinzi tai oto, shika ihashi holoka unene, itashi elekwa nompito yokukwatwa koCovid-19, ndjoka wo hayi vulu okwootitha ombinzi. –Sowetan