Kulilimaniswa kukomokisa muzamaisi

Muñoli mwakampani yebona zakuyaha mandu mwanaha kaufela (NHE), Ntelamo Ntelamo nakomokisizwe kiketo ya kampani yakumulilimanisa famusebezi ni babañwi bazamaisi babalalu. NHE viki yefelile nezibahalize kuli ililimanisize bazamaisi babalalu, ili bababulelwa kuli nebana ni mulelo, one upalile, wa kubata kulundula muzamaisi yomuhulu Gisbertus Mukulu, kuli asike akutisezwa famusebezi kalilimo zeñwi liketalizoho. Kubao baba lilimaniswe kuna ni sibuabui wa kampani Eric Libongani, yabona za zwelopili ya mañusa Appolus Baisako ni Beverly Vugs yabona zamasheleñi.

Ntelamo ubulela kuli usa patehile kunyatisisa liñolo la kulilimaniswa “pili asikaziba sakueza”.

Libongani nahanile kubulela fataba, mi Vugs ni Baisako nebasika fumanwa. Sibuabui wa NHE Tuafi Shafombabi nanitifalize kulilimaniswa kwa bazamaisi ni lituwelo zetezi.

“Bazamaisi bababulelwa balilimaniswe kapilipili, kulibelela lipatisiso,” nekubulezi Shafombabi.

Kufilikana kwababeleki ba NHE nekutahile muinasipula wa kampani, Sam Shivute, habazibisa zakuketwa hape kwa Mukulu. Shivute naize kuketwa hape kwamukulu nekutahile bakeñisa kutalima kampani mo iezelize kwaneku la masheleñi, mi kamulao nekusina libaka la kuyemisa kuketwa hape.

Kanako yatemuso Shivute naize kuketwa hape nekukile kwa nyatelwa kale ki liluko la zwelopili ya libaka za litolopo ni matakanyani la 18 Liatamani 2021.

Viki yetatama yefelile liñolo la lipilaelo kuzwelela kwababeleki neli ize Mukulu natepelezi mwamusebezi, sina kampani hane ipalezwi kukwanisa likonkwani zabutokwa zepeli mwamulelo, ili kuhulisa buka yekolotisa ni kuyaha mandu alikana 1 250 kasilimo.

“Kuncafazwa nekuezizwe kasamulaho kaufela zetokwahala neli nyatezwi. Kikwabutokwa kulemuha kuli kunyatelwa kwa keto ye, nekufelile kale pili lusika amuhela liñolo la lipilaelo kuzwelela kwa bazamaisi ba mwatasi, la 1 Lungu 2021. Babeleki babana ni lipilaelo kuamana ni keto baswanela kuya kwaliluko lelina ni maata akuketa, nihaike kumueteleli wanaha,” nekubulezi Shivute.