Omukunda Oshamukweni gwa mono olusheno
Omukunda Oshamukweni ogwa mono olusheno Etitatu lya zi ko okuza kehangano enene lyolusheno moshilongo Nampower.
Olusheno ndoka okwa li lwa gandjwa okupitila moprojeka yepangelo tayi ithanwa “Rural electrification project”.
Nampower okwa li a gandja olusheno ndoka okutsakaneka epangelo ondjilakati, naashika osha li sha kotha oomiliona N$4,5.
Minista gwoomina niikwankondo Tom Alweendo okwa ti, olusheno oshinima sha simana, nosha pumbiwa okulongithwa esiku kehe, okuninga oonkalamwenyo oohwepo oshowo okulonga nuupu.
“Olusheno inalu talika ko onga oshinima sho ngushu, ihe olu na okukwashilipalekwa nokwiinekelwa, ‘’ ta ti ngaaka.
Minista ta ti, pampito mpaka oosikola otadhi ka mona ompito yokwaandjanekelwa olusheno, naalongwa oshowo aalongi otaya ka mona ompito yokulonga nokulesha nuupu.
“Olusheno olwa simana moomonkalamwenyo dhetu, aakalimo yomomukunda muka otaya pumbwa okutyaatyela oongodhi dhawo opo ya kale momakwatathano naakwanezimo yawo,” a popi ngaaka.
Ta popi ta ti, eliko lyoshimaliwa nalyo otali ka koka oshoka oongeshefa oonshona nodhopokati otadhi ka huma komeho omolwolusheno.
Alweendo ta ti, nonando oosikola 33 moshilongo ashihe odha li dha mono olusheno okupitila moprograma ndjoka, okwa li a lombwelwa kutya osikola Oshamukweni oyo yotango okumona olusheno moshitopolwa shaHangwena omumvo nguka.
“Metengenekothaneko lyoshimaliwalyomomvo2021/2022 oosikola dhi li hamano otadhi ka andjaganekelwa olusheno okupitila moprojeka ndjoka,” osho minister gwiikwankondo a popi ngaaka.
Omukuluntu kwatelikomeho mehangangano lyoNampower Kahenge Simson Haulofu esiku ndyoka okwa ti, Nampower okwa itaala kutya okugandja olusheno momikunda okwa simana oshoka ohaku yambula nokuhumitha komeho onkalo.
“Aakalimo oya manguluka okuninga omayindilo kehangano lyokwaandjakaneka olusheno moshitopolwa shawo, Nored, opo kehe ngoka e na ehalo a mone olusheno lwomomagumbo gawo nenge lwoongeshefa dhawo,” ta ti ngaaka.
Haulofu okwa gwedha po ta ti, omimvo ntano dha piti Nampower okupitila moprograma yokuyambidhidha okugandja olushenomomikundaoyalongidha oomilliona N$50 moshitopolwa shaHangwena ashike.
Omikunda ndhoka dha pewa olusheno ongaashi Onduludiya, ewanifo, Onailonga,Otaukondjele, Omukukutu,Shaama, Hanghome, Nailenge, Onalusheshe, Helao Nafidi,Elakalapwa, Omupini oshowo Oshamukweni.