NIP a pewa oilongifo ipe
Epangelo laAmerica ola yandja oilongifo ipe kehangano lokukonaakona eehonde moNamibia loNamibia Institute of Pathology (NIP).
Oilongifo oyo oi na ongushu yoshimaliwa sheemiliona N$6, 2. Oshimaliwa eshi osha pitila moshikefa shAmerica shokukwafela oilongo yaAfrica.
Oilongifo ei oya yandjwa moWindheok keembelewa doNIP. Elalakano opo Namibia a kale e na oilongife ya wana ngeenge ta ningi omakonaakono ombuto yoCovid-19 nomikifi dikwao da wedwa po.
Oilongifo ei oya tambulwa ko komupeduminista wouhaku Esther Muinjangue.
“Ponhele wouministeli wouhaku onda pandula epangelo laAmerica eshi tali twikile nokuyambidida Namibia, unene ehangano eli lokukonaakona ohonde nokuninga omakonaakono omikifi dihapu moshilongo. Oilongifo ei otai ka kwafela unene,” Muinjangue ta ti.
Muinjangue okwa hokolola ta ti oilongifo ei otai ka eta po elunduluko lakula unene ngeenge taku ningwa omakonaakono ohonde ngaashi omukifi wo-HIV nombuto yoCovid19 nosho tuu.
“Ngaashi naana tu shi shi kutya Namibia okwa kala a taalela eshongo loilongifo yokukonakona ombuto yoCovid-19. Onghee nena ofye ovanelao eshi twa pewa oilongifo yopashinanena yongushu yoshimaliwa shihapu, paife out na okulonga noupu shaashi oilongifo opo i li yawana nawa,” Muinjangue ta popi.
Omukaleliposhilongo waAmerica Lisa Johnson okwa ti America ota twikile okukala e na ekwatafano liwa Namibia. Okwa ti okwa pandula ouministeli wouhaku eshi tau twikile nokulonga noudinini opo u kondjifa ombuto yoCovid-19.