Omiti dhokukeelela omukithi gwoCovid-19 dha thiki mOshana
OMITI dhokukeekela oshowo okushonopaleka ompito yokukwatwa komukithi gwoCovid-19, osho dha thiki mOshana nokiitopolwa yilwe yoshilongo.
Omukuluntu gwoshikondo shuuhaku gwoshipangelo shaShakati Johanna Haimene ngoka a li a tuntilwa tango sho omiti dha thiki ohela okwa ti, oku uvite nawa sho omiiti ndhoka dha thiki mOshana oshowo kiitopolwa yilwe opo gu vule okukeelela oCovid-19 gu taandele.
“Omiti ndhoka odhi li paali dha yooloka “ocovishield oshowo Sinopharm”. Ta ti, omiti ndhoka ihadhi aludha, ihe ohadhi shonopaleke ompito yokukwatwa komukithi gwoCovid-19,” a popi ngaaka.
Haimene okwa ti, omiti ndhoka otadhi tameke tango okutuntilwa aanambelewa moshikondo shuuministeli wuuhaku nonkalonawa oshoka oya talika ko ye li moshiponga okuninga iihakanwa yomukithi ngoka.
Ta ti, omiti ndhoka otadhi katuntilwa kaapangi yeli moongundu.
Oongundu mbali otadhi ka kala dhi li moshipangelo oshinene shaShakati omanga yimwe tayi ka kala koshipangelo shopawumwene Ongwediva Medipark.
Ongundu yimwe otayi ka kala yi li koshipangelo shopawumwene kOndangwa omanga yimwe tayi ka enda nuupangelo uushona momikunda.
“Omiiti ndhoka otadhi gandjwa oshali shaMuhongi, oshowo kiipangelo mbyoka
yopawumwene nda zi nokutumbula. Okuza oshiwike tashi ya otatu ka andjaneka omiti ndhoka pomahala agehe guuhaku nonkalonawa moshitopolwa shaShana, opo kehe ngoka e na ehalo lyokutuntilwa, a thike pehala lyili po pepi,” ta ti ngaaka.
Haimene okwa kumagidha kehe gumwe opo a tuntilwe okukaleka po oshowo okuhulitha ekanitho lyoomwenyo omolwomukithi ngoka.
“Omiti ndhoka itadhi kondjithilwa omuntu, ihe otatu kumagidha nokugandja uuyelele wi ihwa po, opo kehe gumwe a vule okukutha etokolo lyomondjila,” Haimene a fatulula. Ta ti, okutuntila otaku
tameke naanambelewa yuuhaku, aakuluntu yomimvo okuza 50, aantu ye na omikithi dha yooloka, aantu ye li momihandjo nomoondjedhililo oshowo mboka ye na uulema.
Omukuluntu gwoshipangelo shaShakati Asumani Kibandwa ngoka a li a tuntilwa olutiyali esiku ndyoka okwa ti, ina uva elunduluko lyasha konima a tuntilwa, kokutya owenda kayi na uupyakadhi.
“Otandi kumagidha oshigwana shi ye mengathithi, opo shi ye shi tuntilwe, okukeelela omukithi ngoka, gwa faalela oomwenyo dhaantu oyendji muuyuni,” a popi ngaaka.