Zuma: Kapu na eli kombanda yoveta – Aatseyi veta taya ti
Ongundu ndjoka ya kwatela mo omugameni gwoshigwana ngele tashi ya kiikwaveta nale Thuli Madonsela oya li ya yambuka okukala yi na oshigongiunganeko mOsoondaha, moka ya li ya gana okukaleka po etokolo lyompangu onene moshilongo shi na sha noshipotha shomupresidente omukulu gwaSouth Africa Jacob Zuma. Oya li ya popi kutya oya simaneka etokolo lyompangu yoConsititutional Court ndjoka kwa tegelelwa yi ka kundathane kombinga yonakuyiwa yaZuma konima sho a ndopa okugandja omushangwa gu na sha netokolo ndyoka e wete lye mu opalela sho a ndopa okuya komeho gompangu. Oshigongiunganeko shokomalungula, shi li kohi yoshipalanyolo ‘Defend our Democracy’, osha li sha ningwa mOsoondaha moka aayenda ya za miiputudhilo yelongo, momahangano goonkalonawa dhaakwashigwana, oongeshefa osho wo omaitaalo gopambepo ya li ya gandja omatumwalaka taga yambidhidha oshikonga shoka osho wo eitaalo kutya aantu ayehe oye thike pamwe komeho goveta.
“Ngele presidente omukulu Zuma okwamonikaondjookudhinaoveta,otu shi kutya egeelo otali vulu okukwatela mo okuya kondholongo, ta futithwa nenge egeelo tali ekelwahi. Onkene otu li mpaka okusimaneka nokutaamba ko etokolo lyompangu yopombandeelela shi na sha noshizemo shepangulo lyapresidente Zuma,” osho ongundu ya li yu uvaneke momushangwa gwawo.
Madonsela okwa ti ngele opwe ya ompito mpoka aantu haya itula pombanda yoveta uudemokoli otau si nuuyuuki otau ka ndopa thilu.
“Ngele otwa etha oompango dhi kale ashike dhoohandimwe, nena otatu itula mondjila yevundakano,” osho Madonsela a ti ngaaka.
Dr Sizwe Mabizela, omupevikuluntuwiliki gwoUnivesiti yaRhodes okwa ti kape na omuntu e na oonkondo e vule oveta, mwa kwatelwa president Zuma.
“Okuyaka oonzo dhetu naku hule. Oonzo ndhika odha pumbwa okukalekwa po okukwathelwa aagundjuka oyendji moshilongo muka mboka ya pumbwa elongo opo ya ka kwathele oshigwana.
“Otatu yambidhdidha eithikamenopo lyoshitayi shetu shopaveta, otatu yambidhidha omupevipangulikuluntu Raymond Zondo ngoka oye omunashipundi miihokolola mbika. Aantu naya hulithe po oku mu ponokela, ina ilongela omaponokelo ngoka gaafele,” ta ti ngaaka.
Amushanga gwopevi gwotango gwo-SACP Solly Mapaila okwa ti Aasouth Africa oya pumbwa okumanga uukuni kumwe opo ya gamene ekotampango sho tali ningilwa omaponokelo.
“Otwa mona aaleli oyendji yopapolitika mboka ya tokola okuponokela ekotampango lyetu nooveta dhoshilongo. Aasouth Africa inaya pitika oshinima shika, otwa pumbwa okumanga uukuni kumwe tu gamene ekotampango lyetu – shika otashi ka ningwa ashike uuna twa hangana onga Aasouth Africa,” ta ti ngaaka.