Udigu woprojeka zokomambo mokutura rutjeno kuna kugwna makwatesoko
NCUMUSHI – Projeka zokutura rutjeno momukunda gwaNcumushi ezi zakere asi kwazisikamekere ngesi kuna kukaza komeho kutunda tupu apa nomutangu dakerepo nokampani ntani vatungimo momukunda ano ngesi ava nye avalimi mapya ogo, kava geve nye asi vahepa tupu kutwikira.
Venya mapya ntani vatungimo kavageve nye asi vahepa tupu kutwikira nokurugana moutatu kaupwire konyima tupu apa rudi rwegendeso roVasambyu karulihemeseremo ntani nguuru gomukunda Kavango zoupumezuva Bonifatius Wakudumo.
Vitumbo Tjimbamba kwanyokere asi kampani kwatura nopala ne mepya lyendi, ano ava vamwe kwayiumwene asi nopala edi ngano kwakwama sitaura zogarawe, ezi zakara asi 15km monaure. Ano nye awo kwayimona asi kupita momapywa ngayihorako nometa dimwe edi ngadi sesupa kuhorako no km ntano.
Elikwamo eli lyorutjeno kuna kulikulika ngesi kutunda no km murongo kuza koNcumushi dogoro koBaramasioni eyi vana tura asi awo ngava tura nye ponosure ntani papa pwakara nopomba momukunda gwaMashare. Posiruwo nye ose sosigongi , vamwe vatungimo kavatente asi kapi vavapurako kuhan=mena projeka ezi, nye venya kampani awo kuna kutanta asi vatanterako foromani ndi muntu gwaforomani Mathews Munuma, morwa foromani Veronica Nekendu kwakere kuna kukagwana uhaku ponze zomukunda ogu.
Nguuru kahundilire vatungimo asi vahasikama vahegekese ekuliko monomukunda, morwa epangero kuna hara nye kukulika mukunda gwawo. ‘’ ekuliko kuwiza nye lyahepa kuguma mavango geni ano none mwahepa nye kugava evhu lyeni yipo ekuliko lize komeho, epangero lyakara nelikwamo lyokumupako mfuto zongandi nsene asi ogava evango lyoge. Ano apa nye ngesi nopala ne kapi nadinminkisa asi ngano opire kulima epya lyoge’’ yimo ana kutanta Wakudumo.
Nguuru kalikidire ruhafo rwendi morwa maruha nagenye gana tambura kugusapo udigu ou nokutanta asi konyara makwedi gavali projeka ezi kapi zina rugana eyi yawapera kurugana. Varugani wokampani kwahere kutameka mo 1 Murongankuru makura malituturo tagatameke. Makura awo yiyo vahageka vaze vakarugane nakopeke ano ngesi kuna kumoneka asi awo navakatengura konyima zoyivike yivali vayatwikire noprojeka zangesi.’’ Yimo ana kutanta Wakudumo.