Oshipangelo shopaumwene shaNdangwa sha tameka notunhila yoCovid19

Ngaashi naana ouministeli wouhaku we lipyakidila nokutunhila ovanhu moshilongo ashishe kombuto yoCovid-19, oshipangelo shopaumwene shaNdangwa nasho yoo osha waimina oministeli eshi etunhilo eli la tameka monooli.

Meenghundafana twa ninga nomupopiliko woshipangelo shopaumwene shaNdangwa, Lucky Kalipa okwa hokolola efiku letameko la enda nawa nonande oshiwana inashi holoka momwaalu munene. “Onda pandula oshiwana eshi she ya okutunhilwa, unene tuu ovakulupe ve li meedula do60 ovo vamwe ve euya momwaalu muhapu mefiku letameko,” Kalipa ta ti.

Kalipa okwa ti ovanhu aveshe ova tambulwa ko okukala ve ya okutunhilwa koshipangelo shavo shopaumwene.

Okwa twa omufindo ovanyasha opo va kale tava kwatele ovakulupe komesho ngeenge tava i ketunhilo.

Kalipa okwa hokolola ta ti fiyo opaife kape na nande omunhu a vendwa a nyenyeta kombinga yovenda ei.

“Omunhu ngeenge okwa vendwa oha pewa ominute di li 15 opo ku talike ngeenge oku na omalinyengo onhumba tama ka holoka po konima ngeenge a tunhunilwa.

Nautinda Ambrosius weedula 65 okwa hokolola nenyanyu eshi a vendwa ta ti: onda pandula eshi epangelo la eta po ovenda ei shaashi otashi tu kwafele opo tu kale twa amenwa kombuto ei.

Ambrosius okwa ti ina mona tuu nande oupyakadi washa eshi a vendwa, onghee okwa twa ovakulupe vakwao omufindo opo navo va ka tunhilwe. Mopaife ngaa etunhilo ola tameka koipangelo monooli ngaashi: Oshakati, Eenhana, Onandjokwe, noshipangelo shaNdangwa shopaumwene. Omulandu woCovid-19 onghee ngaa tau twikile nokulandulwa komandiki okutunhila oCovid-19.