Omupolifi a monika ondjo medipao laFloyd
ONGUDU yovashiviveta Ovaamerica ova mona ondjo omupolifi ta tamenekelwa edipao lomulumenhu omulaule George Floyd e shi ningila monhanaisho yavahapu moMinneapolis omudo wa dja ko.
Derek Chauvin, 45, okwa li a fanekwa a twa ongolo kofingo yaFloyd oule wominute di dulife pomuwoi.
Okavideo koshiningwanima osho oka li ka ya nounyuni aushe noka li ka eta omahololo omadilaadilo peeenhele da yooloka pefimbo opo Chauvin a kwatwa po muMei.
Chauvin okwa monika ondjo moibofa itatu oyo aishe i na sha nedipao.
Oshimaliwa shokulifutila modolongo osho sha li she mu kaleka kondje efimbo osha kufwa eenghono pefimbo opo tuu opo nokwa patelwa mo. Otashi dulika a pewe ehandu konima yeemwedi mbali, nope na yoo omhito a kale modolongo oule womido omilongo.
MoAmerica osha pumba omupolifi ta monika ondjo mefyo lomukwashiwana, nokuli luhapu ihava pangulwa. Ovapolifi vatatu okwa teelelwa va taalele omapangulo lwokexulilo lodula ei, molwomadipao ovakwashiwana.
Pakuuda oshidjemo shomhangu, ovanhu omangungo ova tameka nokutanha, va hafa. “nena efiku liwa moMinneapolis,” osho omunamido 21 Kenneth Nwachi a ti. “Omailikano etu okwa udika.”
Ovo va li ve lile omahololomadilaadilo komesho otava ti ove udite kutya paife ouyuuki owa longwa, nove udite ondjudo ya kufwa ko komapepe. Eliudo lavo ola faafana naalo lovanhu vahapu ovo ve udite kutya opolifi moAmerica oye shi ikilila okulongifa eenghono da pitilila movalaule.
Ashike ovahololimadilaadilo otava ti okupula ouyuuki u ningwe medipao laGeorge Floyd itali xulile ashike opo.
Otaku hokololwa omunamido 46 ou a landa okapakete komakaya mofitola imwe moumbuwanhu waMinneapolis komatango omafiku 25 Mei 2020.
Omunailonga mofitola okwa li e udite kutya Floyd okwe mu pa efo loUS$20 loipupulu, ndele ta anye okupa Floyd omakaya.
Eshi opolifi ya fika pofitola opo oya lombwela opo a dje mo mohauto yaye oyo ya li ya fikama nokumangela omaoko aye konima. Onghondja oya tukuka eshi opolifi ya kendabala okutula Floyd membaba. Ove mu undilila pedu naChauvin okwa kala e mu twa ongolo pofingo. Floyd okwa kala ta kuu ta ti ita dulu okufuda, ashike Chauvin ine mu pwilikina. Ovakwashiwana ovo va li tava tale ova kala tava ingida, tava lombwele Chauvin a efe Floyd, ashike ine va pwilikina. Konima yominute tadi lishilile pomulongo, Chauvin okwa fikama ko kuFloyd oo pefimbo opo a li ite linyenge vali. Okwa ifanwa ombulansae oyo ya twala Floyd koshipangelo, ashike ina fika ko nomwenyo.