AU ota ka kundafana oupyakadi moChad nomoSomalia
OKOMITIE i lile po ekaleko po lombili mokomisi youkumwe waAfrica (AU), oya shakena onghela okukundafana oupyakadi wa taalela oilongo ivali menenedu –Chad naSomalia
Momushangwa uxupi, omupopiliko womunashipundi wo-AU Ebba Kalondo okwa ti omutumba ou li oshinakuwanifwa shokomitie okukundafana noku uya po nekandulopo lomukundu peemhito opo pe na omananafano.
Eshi otashi ningwa konima ashike yefiku esho ovanapolitika moChad va ulika omonamati wanakufya Omupresidente Idriss Déby’ oye a ye ponhele yaxe.
Déby, 68 – oo a kala koshipundi oule womido 30 okwa xulifa konima eshi a monifwa oshiponga molwoodi pokati kovakwaita vepangelo neelebele. Chad okwa kala a talika ko onga oshilongo sha fimana mokulwifa eebanditu dOvaislamist muAfrica. Kakele kaChad, Somalia ye okwa taalela oudjuu welundululo lekotamhango, oshipundi shoupresidente tashi kondjelwa nosho yo epiyaano mokati kovatotiveta.
Oshivike sha dja ko omupresidente waSomalia Mohamed Abdullahi Farmajo okwa lelepeka ekalo laye koshipundi noule womido mbali da wedwa ko.
Oilongo oinanghono mounyuni mwa kwatelwa US naBritain osho yo omalutu omalelo oilongo mounyuni ngaashi UN, EU na-AU okwa yemba elelepeko eli, taa pula opo shi talululwe shaashi etokolo olo otali dulu okuhanyeka omakuyunguto opapolitika oo e li nale moshilongo omo.
Okakomisi kokutula po ombili neameno ko-AU otaka dulu okupula opo oshilolongo sho-AU osho tashii pombambo youdemokoli shi tulilwe po eendjidikila. Eedjidikila odo oda kwatela mo ekufemo lopokafimbo loshilongo mongonga ya-AU.
Omuleli mupe waChad Mahamat Déby, olyeye?
General Mahamat Idriss Déby Itno okwa dalwa mo1983, noku li umwe womovanamati vanakufya omupresidente Idriss Déby.
Pefimbo lefyo laxe, oye a li omutwe wetanga leameno tali amene omupresidente, nokwa lwa oita ihapu onga omukwaita weameno.
Nonande ke na naanaa eshivo mouleli nomoukwanepangelo, Mahamat Déby okwa ulikwe kovaleli moshilongo oye e shi kwatele komesho mepangelo lopaukwaita olo tali kala koshipundi oule weemwedi 18 eshi omahoololo taa ka ningwa.