Onghalo moHavana inai likosha
...Omaumbo 45 otaa longifa okandjuwo kamwe
OVAKALIMO womolukanda Oohambo dhaNehale moHavana moWindhoek ova lulilwa komhumbwe youndjuwo molukanda lavo. Ovakalimo a va otava ti paife omido hetatu ve li momhumbwe youndjuwo.
Ovakwashiwana vopomudingonoko opo ova hokololola tava ti ohava longifa okandjuwo kamwe, haka longifwa komaumbo e li 45.
Ova lombwela Kundana tava ti ovanhu vamwe ohava i komilamba opo ve ke likwafele ngeenge oushitwe tau u fana. Onghee ova hala epangelo opo li va tungile oundjuwo va wana pomudingonoko wavo. Ova ti okandjuwo kamwe aka hava longifa otake va etele omikifi d lili nokulili shaashi ohaka longifwa kovanhu vahapu unene.
“Ohatu di molukanda lihe na olusheno, ngeenge omunhu to i kokandjuwo oufiku ohaku kala kwa laula unene onghee out li oihakanwa yokuningilwa oushada ngaashi okudipawa nomakwatonghonga”.
Immanuel Nghiidipaa ou e li omukalimo mOohambo dhaNehale ou a kala mo oule weedula hetatu okwa hokolola ta ti ove li meshongo lakula eshi ve li momhumbwe youndjuwo.
“Efimbo limwe omunhu ngeenge toi kokandjuwo uke livatele oto hange ko nale ovanhu ve li momukweyo wokuya mokandjuwo shaashi ovanhu ovahapu va hala okulongifa okandjuwo oko kamwe akeke,” Nghiidipaa ta ti.
Kansela woshikandjohoololo shaMoses//Garoeb Aili Venonya meenghundafana a ninga naKundana kombinga yoshikumungu shomhumbwe youndjuwo moshikandjohoololo shaye okwa ti ombelewa yaye oya kala nokulopotelwa onghundana ei yomhumbwe youndjuwo polukanda opo.
Venonya okwa ti okwa kala nokushangela omikanda dihapu kombelewa yaMayola woshilando shaWindhoek ta pula opo ovakwashiwana pomudingonoko opo pe na omhumbwe youndjuwo va kale va tungilwa oundjuwo va wana, a shike ina nyamukulwa fiyo onena.
Meenghundafana a ninga naKundana omupopiliko woshilando shaWindhoek Lydia Amuntenya okwa ti ombelewa yamuni woshilando shaWindhoek oya didilika omhumbwe youndjuwo keenhele dihapu moWindhoek unene tuu komalukanda ngaashi laHavana.
Amutenya okwa ti ombelewa yelelo loshilandopangelo oya longekida oshimaliwa shifike peemiiliona N$104 shomudo 2021\2022 opo shi longifwe okuyandja omayakulo komalukanda moWindhoek ngaashi okutunga oundjuwo noukuninga oupomba vomeva.
Okwa kunghulila oshiwana opo shi kale shi li mengungumano, yee ta weda po ta ti oshiwana nashi xulife po okukala tashi teyaula po oinima ya muni ngaashi vati oupomba vomeva vahapu ova teka po komalukanda paife.