Gumwe a sile moshiponga shohauto

Oshiponga shi nyanyaleka osha holoka Osoondaha ya zi ko, nosha faalele omwenyo gomulumentu gwomimvo 51.

Omukuluntu gwopolisi moshitopolwa shaShikoto Armas Shivute okwa ti, oshiponga shoka osha holoka lwopotundi 19h00 yokomatango popepi nomukunda Onalunike pokati kOndangwa nOmuthiya.

Otaku hokololwa kutya omulumentu ngoka okwa li ta hingi ohauto yoToyota, ta zi kombinga yokOmuthiya a taalela kOndangwa.

Ta hokolola ta ti, ohauto ndjoka okwa li yi idhenge omutse nomutse nololi ndjoka kwa li tayi zi kombinga yokOndangwa ya taalela kOmuthiya.

Shivute ta ti, kape na uuyelele kutya oshike sha etitha oshiponga.

Eloli ndyoka okwa li lya humbata iikalate yoombila kayi na sha nolyali lya tema omulilo ethimbo ndyoka, nakuhinga ina mona oshiponga.

Ololi ndjoka oye hangano lyo-J&M. Nakusa okwa tseyika nedhina Nghipangelwa Ndatungaeumbo David, aakwanezimo ye, oya tseyithilwa.

Opolisi moshitopolwa moka oya kumagidha aahingi yiihauto ya hinge nuukeka mopate ndjoka, okuza kOmuthiya okuya kOndangwa oshoka otayi longwa pakathimbo.

Moshiningwanima inaashi faathana omulumentu ta fekekelwa e na omimvo 30, okwa si sho a yahwa nondjembo anuwa sho kwa li ta iteyele megumbo lyaantu.

Sha ikolelela kepeko lyopolisi oshiningwanima shoka osha holoka koongulasha dhoSoondaha momudhingoloko gwaNiipa moshitopolwa shaShikoto.

Otaku hokololwa kutya omulumentu ngoka anuwa okwali akambadhala lwotango okupitila mekende lyokandjugo eta ndopa, ta kambadhala olutiyali okupitila pekende lyegumbo natango tandopa nolutitatu anuwa okwali ateya pomwelo, sho ali ngeno a pite aye meni, okwali ayahwa.

Opolisi oyati, omufuthi ngoka okwali ayahwa iikwando iyali koshama nomepunda, eta si ethimbo ndyoka.

Mwene gwegumbo okwa mangwa po, nomakonaakono gopolisi oge li metifa.