ǂNamipeb ministeris ge !aubǀguruna hân tidepa ūǀgaras !oa-ai ra !gâikhom
Ministeris ǂnamipeb !ûi!gâs dis ge ǀhûhâsiba ge !khâikhom in ǂgōsen ǂgaoǀkhāsa māams ǂkhanin ǁgauǁgaus ose !aubǀgurun tsî ûitsama xamarina ūǀgarasa, ǁnāti ī khoen nî !khōsis !nâ ūhe tsî ǀhapixasen kara hōhe o, !ûǂams !naka ǁkharaba ǁgui-aihesa.
ǂOa ge wekheb Mantaxs aib ge ministeris ǂnamipeb dis di mîgowaba-aob, Romeo Muyundaba māǂui hâ i !khâikhoms !nâ I ge gere mîhe, ministeris ge kai !hausens ǀkha a ǂanǂanhesa, mā-ams osen ra !aubǀguruna khoen xa aitsama a ǀhonkhoeaisa !garo!ādi, !hū!âdi tamas ka i o !khaigu !nâ mā-ams ose ra ūǀgarahesa.
Nē ūǀgarahes !aubǀgurun dis ge !aub !ûi!gâs ǂHanumās 1975ǁî kurib di 4 tsî ǁkhawa kō!gâsa ǂHanumās 9, 2008ǁî kurib dis Mûǂams !Aubǀguruna xu a hōsa xūn tsî ǂHarugub ǂHanumās hâra ra !ûǂam.
Ministeris māǂui hâ !khâikhoms ge ra mî, aitsama a ǀhonkhoe-aisa !garo!ādi, !hū!âdi tamas ka i o !aubǀgurun ra ūhâ!nâhe !khaigu ǁnāti ī ǀhonkhoen ra nē !aubǀguruna ūhâ!gaon, ǂgaoǀkhāsa permetde ministerisa xu hō tamase.
ǁKhātin ra ǁnān hîa mā-ams ǁgauǁgausa ministerisa xu ūhân tsîna xoaǁguisa ǁnâugus ǁgaraga !gôa!gâ tamase ai!gû hîa.
ǂHâbasa tsî ǂûǂûxa mûǂams !hūb di !aubǀgurun tsî ûitsamaxūna kō!gâs dis, ge Namibiab !nās !aroma ǂhanugu tsî xoaǁguigu !naka nî dīhe.
ǁNā-amaga i ge ǀgau ra ǁkharaga ǁnān hîa ǁguisa ǂhanugu tsî ǂhanumāsa ra !ûǂamn !oagu nî ūhe ǁî-i !ûǂams ǀkha ra ǀgause.
“!Nāǂamsasib !nâ noxopa !kharaga hain tsî ǀguruna Namibiab !nâ ūhâsa ra īǁkhā kais ge, ǀkhamasa ǂhanusi ǁgaragu, xoaǁguigu tsî sîsenga dīs daoǁgaugu tsîna, ǁnā-amagas ge ministeris ǂnamipeb disa ǂhâbasa ôa!nâde nî dītsoatsoa îs !urus nē mâsib disa oresa hōba.
Ôa!nâs khao!gâs ge ministerisa ǂhâbasa dīǀgauga nî sîsenū tsî mâsiba ǂhanuseb ge hâ isa !oa nî oahā-ū tsî nî ǁawoǁawo, hoan nēs xa ra tsâǀkhāhen nî ǀhûhâse ǁguisa ǁgaragu tsî ǂhanumāde ǁnâuǀnam tsî ǂhanuse ǁgaraga sao tsî dīǂuisa.
ǂGaoǀkhāsa permetdi nî ǂganamsenbahe tsî ǂhanugu !oagu !aubǀguruna sîsenūhes ge ra ǁkhorehe,” tis ge ministerisa gere khom.