Ya pula oondjambi dhaatonateli yomaliko dhi gwedhelwe noN$10

Omukalelipo wehangano lyaatonateli yomaliko lyoNamibia Independent Security Union (Nisu), koKeetmanshoop Lukas Moyyo okwa pula opo oondjambi dhaatonateli yomaliko dhi gwedhelwe oku za poN$10 noku ya poN$20 mowili.

Moyyo okwali ta popi koshigongi shaayehe sha ningwa kokakomisi kaatotiveta, hoka a pula wo opo oowili ndhoka hadhi longwa kaatonateli yomaliko dhi shunithwe pevi oku za poowili 12 oku ya poowili omugoyi mesiku, ta ti oowili tadhi wedhwa ko nadhi kale dha tali ka ko onga olutaima.

Moyyo ta ti nonando moshikondo shoka omu na ove ta ya gandja kutya aantu yana futwe oshimaliwa shithike peni omahangano guusekuliti ogendji ihaga futu aantu oshimaliwa shoka.

“Iinima mbyoka ya kala tayi ningwa kaagandji yiilonga, taya kolonyeke aamwameme, taye ya pe omasiku gefudhepo ogendji opo okaa ye ya futu nayi ye pehuulilo,” Moyyo ta ti.

Ta ti iiyenditho oku ka tala noku fala aaniilonga komahala hoka taya ka longelo oshinima tashi dhengele, ashike moKeetmanshop omu na owala ehangano limwe olo hali shi ningi.

Moyyo ti oondjambi dhopetameko dhaaniilonga odha pumbwa oku kala hadhi gwedhelwa kehe komvula.

“Ito vulu oku tya oto ka lundulula owala konima yomimvo ntano, eliko lyuuyuni otali vulu oku kala nawa uule womimvo mbali, ihe konima yoomvula ntano onkalo oyi na oku kala ya lunduluka. Okakomisi kaaniilonga nokuli oka pumbwa oku gandja eigidho kaagandji yiilonga opo ya gwedhele oondjambi konima yoomwedi ndatu,” Moyyo ta ti.

Omukalelipo gwehangano lyoNamibia Food and Allied Workers Union (Nafau) moKeetmanshoop, Rosalia Albert ye okwa ti aaniilonga miikondo yomayakulo goohotela nomahala gokulila noshowo muupashiyoni, yo oya pumbwa oku kala taya pewa oshimaliwa shoN$3 000 kehe komwedhi omanga yomoositola ye na andola oku futwa oshimaliwa shathikama shoN$6 000.

Albert ta gwedha po ta ti aaniilonga moongeshefa dhonyama naya kale taya kwata oshimaliwa shoN$7 000 kehe komwedi omanga aaniilonga mboka haya longo koshilemo moshikondo shuunamapya yo naye futwe oshimaliwa sho N$4 969 kehe komwedhi, manga mboka ya kutwa miilonga taya kalelele oN$5 405. “Shika osho iilyo yetu yi uvite kutya nashi kale oofuto dhopetameko dhaaniilonga mboka yakwalu kehe. Otwa pula wo opo kehe omuniilonga a kale ta pewa oshimaliwa shoN$2 000 shegumbo nosho wo iiyenditho yaaniilongam” Abert ta ti. Okakomisi hoka kaatotiveta oka tameke niigongi yaayeyehe, ka hala okuuva iiyetwa po yinasha noondjambi dhopetamekao nosho wo iinima yilwe ya yamwa kwaashoka noonkalo dhiilonga. Noshinima shika osha tameke muMaalitsa nuumvo.

Elalakano lyako oku konaakona kutya oondjambi ndhoka dhili mondjila moshikondo kehe mbela otadhi kala dhi thike peni, dho dhi vule oku tulwa miilonga. -Nampa