Omalandulathano goCovid-19 poosikola ga nkondopekwa
Aalongwa oya kumagidhwa ya gwanithe po omalandulathano noompango adhihe poosikola, okukeelela omukithi gwoCovid -19, okuza esiku lyotango sigo omasiku 58 komeho sho osikola tayi ka pata natango.
Omukuluntu gwelongo moshitopola shaShana Hileni Amukana okwa kumagidha aalongwa ya iyuthe koompango adhihe dha tulwa po.“Aalongwa naya kale taya iyogo koonyala ethimbo alihe, naya kale ya zala uumasika noku longitha ikeelelitho ayihe okukeelela omukithi ngoka,” Amukana ta popi ngaaka.
Okwa gwedha po ta ti, omukithi ngoka ohagu taandele mbala momahala gwomangundumano, ngaashi naana mokati kaalongwa, onkene kehe okanona oka pumbwa okwiisila oshimpwiyu ko kene kehe ethimbo. “Okuzala uumasika kehe ethimbo kaalongwa ohashi kala uupyakadhi, ihe otandi ya kumagidha opo ya kambadhale ya kale yewu zala ethimbo alihe yeli posikola,” ta ti ngaaka.
Ta ti, otuli mekuthikuthi etitatu lyomukithi gwoCovid-19, ndyoka lyanika oshiponga onkene oompango nadhi simanekwe okukeelela omukithi ngoka gutaandele.
Ta kumagidha aanona kaaya kwatathane komalutu oshowo okudhana posikola.
Amukana natango okwa kumagidha aalongi ya kaleke po elandulathano lyoku pititha po omahala pokati komulongwa nomulongwa. “Otandi kumagidha wo aalongwa yondondo onti 11-12 ya itulemo miilongwa yawo. Naya longithe ethimbo lyawo ndyoka lya tulwa po, okwiilonga ku yo yene kaapena aalongi nonando opena aakaleli, opo ye ke shi endithe nawa momakonakono ga hugunina,” ta kumagidha. Ta ti, otatsu omukumo unene aalongwa yondondo onti 11, ya kutheko oongaku eta ya lesha yiitulamo okuya kondondo yawo ya hugunina. Omukuluntu gwelongo muuministeli welongo Sanet Steenkamp okwakumagidhi aanilonga ayehe muministeli welongo yalonge yiitulamo noku gwanithapo iilonga yawo.
“Natu longeni twiitulamo notwa manamo, natu mangeni ukuume kumwe atusheni opo tusindaneni pamwe,” ta ti ngaaka.
Ta ti, oompango adhihe dha tulwapo okukeelela omukithi ngoka guli mo kati ketu nadhi gwanithwepo.
Omulongwa gwoposikola pEhenye Primary mOshakati, e li mondondo ontine, okwa lombwele Kundana ta ti, oku uvite nawa sho atameke osikola.
“Ondu uvite nawa oshoka omumvo gwa yi okwa li twa ningi ethimbo tu li pevi notwa li twa pitililwa po koshindji, uuwanawa wosikola inatu wu mona omolwomukithi gwoCovid-19 ngoka gwe ya muuyuni awuhe,” Tuendele a popi ngaaka. Okwa gwedha po ta ti, ota kumagidha aalongwa aakwawo ya tsikile okulesha omambo gawo oshowo okusimaneka omalombwelo gaakuluntu yawo, nkene yena okwikeelela komukithi gwoCovid-19.
Tuendele okwa ti, oku uvite ko oshiponga nuupyakadhi womukithi ngoka, onkene itaka pitika omulongwa omukwawo akonde oompango nomalandulathano inemu pukulula nenge emulopote komulongi gwe.
“Sho nda kala mefudho onda kala handi tala otv noku pulakena oradio nkene aantu ya kala taya kumagidhwa, okwiigamena komukithi gwocorona oshowo okunkondopaleka akwiita yolutu,” Tuendele a popi ngaaka.