Aaeritrea taya ti: Otwa sindi uukoloni ihe inatu manguluka
Muule woomvula 30 ndhoka twa kala okukondjela emanguluko lyetu komulungu gwondjembo, otwa kala mokati kiita owili kehe. Otwa igilile uuwehama nokwiigandja. Oyendji yomutse oya li ya lemanekwa iikando iyali nenge itatu sho tatu kondjo. Otwa li twa pangwa mbala ee tatu tsikile nolugodhi lwa landula. Natango ohandi kala nomaipulo kutya osha enda ngiini tu ze koQarora, muumbangalantu waEritrea twa thinda koDumeira, kuumbugantu, tatu lala momakoololo nokulonda oondundu nomasilu. Onda li gumwe omunelago. Konyala aakondjelimanguluko yetu ya adha po 65 000 oya li ya sila momalugodhi. Onda li nda wayimine ekondjelomanguluko ongomunamimvo 16 mo1982 konima sho nda uvu omahokololo kombinga yaEthiopia ta longitha oonkondo dha pitilila, nonda li nda fuulwa komafano gaakondjelimanguluko ye na omafufu omale, ookotse noondjembo dho-K47.
Onda li nda dheulwa uule woomwedhi oonshona moArag Valley. Otwa li twa longwa okuponokela nokufadhuka po, nkene tu na okuholama nokulongitha iilwitho, mwa kwatelwa oomboma dhopeke noo-RPG. Edheulo lyetu olya li ewananwa. Otwa li wo twa mono elongo lyopapolitika, mwa kwatelwa nkene tu na okutota po epangelo lyuudemokoli.
Onda li nda lu omalugodhi ogendji, nolwahugunina olugodhi lwokoshilando shokomunkulofuta shedhina Massawa moshikonga shedhina Fenqel muFebuluali 1990. Oshikonga shoka osha li sha simana noonkondo. Osha li sha thiminike etanga lyegameno lyaEthiopia lyi ze mo moEritrea. Otwa li twa lu omalugodhi ga kwata miiti uule woowili 72 opo tu kwate ko oshilando shika sha simana, notwa li twe shi gamene uule womvula nasha koongamba dhasho dhookilometa 100. Momalugodhi ngaka onda li nda ehamekwa komutse nokoonyala. Onda li nda ka pangwa koshipangelo. Sho nda lalekwa onda shuna natango momuthitu ndi ka tsikile.
Oku uka pehulilo lyomumvo 1990 onda li nda tumwa ndi ka wayimine ongundu yopamuthigululwakalo opo tu ka imbe omaimbilo gokukumika aakondjelimanguluko. Mo1991, otwa li mokantuntu kaDahlaka Island, popepi noMassawa, sho tu uvu onkundana onenenene kutya otwa mona emanguluko lyetu.