Ekwatopombabyona lokamatyona (13) kali na ouyelele –Shapumba ta ti

Opolifi oya ti natango otai konaakon oukwashili womapopyo taa halula a ningwa komulumenhu umwe wokoWalvisbay, oo ta hokolola vati okaana kaye kokamati keedula 13 ka kwatwa po ombabyona kovalumenhu vehe shivike, ndele taka ka hangwa koWindhoek.

Xe yokaana okwa hokolola okamonamati ka lopotwa kakana Omandaxa omafiku 24 May, efimbo lomutenya po13h30 molukanda Tutaleni modolopa yaWalvisbay.

Meenghundafana a ninga naKundana xe yokaana okwa hokolola ta ti kutya okwali a pa okaana oshimaliwa sheeN$50 opo ka ye ka kakululwe ponhele ili popepi neumbo lavo.

Vati eshi nee okaana keli mondjila yokukalulwa oka ponokelwa kovalumenhu veli vatatu tava ningi omatilifo kutya otave kadipaa, umwe vati okuna ondjembo yombistoli, omanga umwe okuna ombele. Vati ovalumenhu ovo ova kufa okaana oko ndele tave katula motuwa yavo yokatuukala nokushinga va yuka koWindhoek.

Okaana vati oka hokolola xe ta ka ti okaya novalumenhu ovo veli vatatu fiyo tava kanghamana mOkahandja ponhele yokunwefa omaholi ei ili popepi neefitola daKahandja.

Vati eshi ovalumenhu ava va tatu vakanghama aveshe ova ndja mo motuwa tava popi meengodi, ashike mboli ova dimbwa oku pata omivelo dotuwa.

Onghee vati okaana oko oka ninga onghendambala opo kandjemo motuwa nokufaduka po meendelelo.

Xe yokaana ta twikile nokuhokololela Kundana ta ti okundja opo okaana eshi ka ndja mo motuwa oka kalefa otuwa yauka koWindhoek ta ka ti vati otaka ka futilwa kovakulunhu vako.

Nokundja opo vati oka yandja ongodi yaxe komushingi opo ka lombwele xe kutya oka fika moWindhoek noku mu lombwela yoo vali kutya okwa li kakwatwa po kovalumenhu vatatu.

Xe okwa lombwela Kundana ta ti okwa lombwela kaume kaye eli moWindhoek opo a ka tale po okaana kaye keli moWindhoek, yee eka hange kuye.

“Onda ninga onghendambala yokushinga fiyo omo Windhoek ndika tale ko okaana kange noku ka eta keumbo Walvisbay,” xe ta ti.

Meenghundanafa a ninga naKundana omupopiliko wopolifi moshitukulwa Erongo Ileni Shapumba okwa hokolola ta ti opolifi oya kala nokupulapula okaana, naxe yako paumwene opo i ninnge omakonakono omoule.

Shapumba okwa koleka kutya okaana oka monika kuxe nokeli nawa.

A shike okwa yelifa ta ti opolifi oya ninga omakonakono a longekindwa amwe po, noyamona kutya kape na ouyelele wayela nowakolekwa manga kutya okaana okwa li tuu kakwatwa po ombabyona shili. Okwa ti omakonakono opolifi onghee ngaa taa twikile natango kombinga oshikumungu eshi.

“Ohandi kunghulile oshiwana shi kale shangunguma unene tuu ovadali pefimbo longhundana ei shaashi kapena ouyelele wakolekwa fiyo opapa tuu nande,” Shapumba ta ti.