Ovakwashiwana moNigeria va kwata nokutelekela ombudi
Ovakwashiwana pomudingonoko umwe moNigeria, ova telekela omunyafuli womaliko ovanhu, noku mu pa oukunwa va talala nawa omanga inave nu pa ehandu loku ka fitulula omunino wonyata wa ninga efiku wafita. Konima yehandu okwa tulwa mondabo noku kumaidwa kovakulunhu opo osho a ninga ehe shi ninge vali.
Dilaadila ashike to dimine po omunhu eku vaka ndele tomu pe a lye. Oshinima eshi osha pumba moiwana ihapu muAfrica. Ngeno ovamwe ovemu tula mondabo ndele tave mu di ondjala needibo.
Ashike oshiwana shopomudingonoko umwe moNigeria osha hoolola onghenda noku kumaida ombudi ya shivika nawa pomukunda pefimbo yali ya hala oku longa omunyonena oo ya shivika nao nawa – okuvaka. Eshi va ninga tete tete oku telekela kalyongo oo –ehen! Inave mu telekela ashike oikulya yanafangwa, ashike oikulya iwa, ndele tave mu pe oikunwa ya talala nawa, ngaashi naanaa omweenda a fimana.
Efimbo ta li eendja daye, loo engungo lovanhu ovo vali va handuka ola kala lemu teelela nengungumano, fiyo naanaa ota mane okulya, opo vemu pe ehandu laye. Ove mu lombwela opo a katuke a ye mokandama konyata opo a fitulule omunino oo wa yamo, noko nima teka tape noku ka yeleka filu. Kalyamupombo okwe li ufa kwaashi ta lombwelwa, ta dula mo nokuli nohema yaye opo a dule oku longa nawa oilonga oyo a pewa melandulafano. Konima eshi a mana, ovakulunhu monhele opo ove mu kaleka omutumba ndele tave mu kumaida opo a tule po oilonga youngangala oyo eli tula muyo. Ovanhu vahapu kosocial media ova kuminwa oshinima eshi sha nyika eputuko, tave li pula kutya osha enda naanaa ngahelipi opo ovakwashiwana ava va longe momuko umwe ndele tava kala ina va dja ondjala omunyafuli woinima yovanhu ou. Vamwe otava ti nande a longelwa ouwa ngaho, oumbudi ite u tula po, ngeno a dengelwe ashike ile a twalwe kopolifi opo a ka patelwe mo. –Tuko