Afrikab ge Covids soǀôan ǀnûgus !nâ ra khaohâ kaihe
!Hûǁaresa !Hūgu (UN) ge ge mî, ǁnāpas mûmûsa ǀgorasa corona xoxoros soǀôana ǀgoraǂuis !nâ hâsa, Afrikab !hūgu 2%kha ǀguikha hoa !hūbaisise ra ǀgorahe soǀôan xa ra !khō!oasa.
UNs di Sekreteres Xenerali, Antonio Guterresi ge Afrikab Tsēsa tsēdīs !aromab ge ǂoa ge wekheb Denstaxs ai māǂui hâ i gowaǀîs !nâ nē ǂâiǂhansensa ge gowaǂui.
Guterresi ge a mîs ge, ǂhâbasa i a !khaisa ǀguitikōsib tsî hoana !khōǂgā hâse Covid-19 soǀôana ǀgūǀkhāsa ǁawoǁawos nē ǁōsa ǀariǂuis !aromas, ǂkhâ!nâ !hūgu di sâuǁkhāsigu nî ǁkhawa ǀomkhâisa tsî ǁnās !nâ-ū Tanihe ǁkhā Omkhâisens ǁGūbade sī!nâsa.
“Afrikab Tsēs nēs ai ta ge ǁkhawa ti ǂgaisa ra ǁgui!gâ, î gu omkhâisa !hūga Afrikab ǀkha ǀguipa mâ. Covid-19 ge hoa !hūbaisise sâuǁkhāsiga ge tsâǀkhā hîa ge ǀguitikō-o!nâsigu tsî ǂkhawusan a ǁgâi!gamsa !khaisa a ǂoaxa-ūsa. Nē mâsib ge kaise !gomn !nâ sī!nâhe hâ omkhâisens Afrikab tsî ǁîba !kharu hâse hâsa !aorosasib !nâ ra mâi,” tib ge ge mî.
ǁKhātis ge nē Covid-19 ǁōsa !omgude ra !aroma xūna ge ūkhâi!nâ tsî ǂkhawusa ǂgaeǂguide ǂhanugu ǀkhāba xu ge ǂoaxa-ū, !gōsase !gao!gao ǂhâsiga !hūǁîna mās ǂgaiǀons ai ǂurusib !oabadi, ǁgau!nâs, !nanǀgaib, ǁgam-i tsî ǂkhari-omn tsîna.
Nēn ga hâ, xaweb ge Guterresa ge mî, Afrikab di !khūhâ tsî !kharaga !hao!nāsi ǂūsigu tsî hâ a ǀumis tsîn ǂgaoǀkhāsa ǀgaisa !gao!gaob, hîa hoana ra !khōǂgāba a mā ǁkhāsa, sâuǁkhāsib ǀomkhâis !nâ ǀomkhâisa sī!nâs !aroma, ǀhûǁarebesen ra Covid-19 ǁōs di ǁgoaǂuide oresa hōbas sī!nâsa ǁgūba ǁaeb !nâ, tib ge Sekretares Xenerala ge mî.
“Nē kurib Afrikab Tsēdīs ge ǂâisa ǂnuwiǁkhāsib, !hao!nāsi ǁnaetin tsî ǀumis ai ra ǂnûi, ǁîn Afrikab hîa da ra ǂgaoba ǀgūǀkhās !nâ a hui da ǁkhā amaga. Afrikab !khūhâ tsî !kharaga !hao!nāsi ǁnaetin tsî ǀumis ge a ǂhâǂhâsa, ūǀgarahe ǁkhā omkhâisens, ǀgâsiba ǀoroǀoros tsî ǂkhîba !hūgu !nâ !khōǀgaras ase,” tib ge ge mî.
Nampas ǀkhab ge ǂoa ge wekheb Denstaxs ai ūhâ i dî!nâgamǁare-i !nâb ge, sîsenǂui ra direkteri ǂurusib ministeris dib, Ben Nangombeba ge mî, Namibiab nēsis kōse ǂkhîǂkhîsa ǀnōb soǀôana ge !khō!oasa.
ǁÎb ge ge mî, Namibia ǁîb soǀôan Covid-19 ǁōs dina Covax ǂharugub !nâ-ū ra ǁamasa. Namibiab ge 100 000 !khāǁkhaedi Sinopharm-i, Chinese ǂhanub xa ge ǀkhaehese, 30 000 Covishieldn hîa Indiab !Hūǂnûǁkhaebas Namibiab !nâsa xu tsî 24 000 AstraZeneca !khāǁkhaede Covaxsa xu ge !khō!oa.