Buñata bwa mafu aKorona habasika pendwa

Naha Namibia izwelapili kubiha nombolotuna yabatu babashwa kwabutuku bwakorona. Lipiho zakazazi zamafu lisupeza kuli buñata bwa babatimela habasika pendiwa.

Kacwalo likwambuyu wamakete Kalumbi Shangula naize taba yeo yabilaeza, mi naize konji babafumani feela mupendo wapili kibabañwi babatimezi.

“Buñata habasika pendiwa. Butokwa bwa kupendiwa kikuli musilelezwa kwakufumana butuku. Haiba yomuñwi afumana butuku kutata kuli alobaziwe mwasipatela kapa atimele. Kacwalo lumema sicaba kuli bafumane mupendo,”nekukupile Shangula.

Hala lipiho zaviki yefelile tolopo ya Windoko ibihile lipiho zepahami, mi sikiliti saKhomas sizwelapili kubiha lipiho zeñata.

Batu babafitelela 100 000 seba amuhezi mupendo wa Sinopharm ni AstraZeneca.

Nombolo yababa amuhezi mupendo wabubeli waAstraZeneca neyemi fa 17 215.

Shangula hape naswabisizwe kimaikuto akuli lipiho zamafu ni kuyambula liekelize kasamulaho akupenda batu babañata.

“Maikuto akuli nombolo yababaswalezwi kakokwani kakorona iekelize hana bupaki. Nikupa sicaba kuhana maikuto ao asina buniti nikuli baye kwamupendo,” nabulezi.

Nombolo yababaswalezwi kakokwani kakorona ise ifitelezi 70 000. Hala kutatuba kakokwani ka Covid-19, Shangula naize naha Namibia kiyabubeli mwa Afilika kulatelela South Africa.

“Kutatuba kikwabutokwa kakuli kulukonisa kufumana litaba zenca, nikualuhanya litaba, nikubona kuli kakokwani ka ambalakana cwañi, nikuli lukona kualabela cwañi,” nabulezi.

Natalusize hape kuli kuekezeha kubabalobazwa mwalipatela kusweli kusunda kalulo yamakete.

Lipatela linze likatezeha kubuluka bakuli baCovid-19, sihulu babakula matuku amañwi bakeñisa tokwahalo yalisebeliso ni minshini yakubuyelela.