Covid ilyehisa muzeko wabulyangelino
Konahalo yakuli nabile bukaufi nimubeleki yana swalezwi kakokwani kakorona, kuhapelelize muyemeli wamulao Slysken Makando kusaya kwamuzeko, teñi babanyalani ni mulikana’ bona banyaziwa kabulyangelino bwa masheleñi alikana bolule bababeli kwakampani yaMultiChoice yaNamibia.
Muyemeli Kalundu Kamwi nabulelezi muatuli mwaKhuta Yepahami mwa Windoko Herman January kuli yomuñwi wababeleki baMakando naswalezwi kakokwani kakorona, nikuli natatubilwe mi ulibelezi linepo. Bakeñisa kulyeha kwalinepo muatuli naisize taba kwapili.
Manga Nawa-Mukena walilimo zemashumi amane, ni muuna’ hae Joseph Mukena walilimo zemashumi amane kazesilezi, ni mulikana’ bona batalimana ni milatu yabulyangelino, kubata kuuzwa, kusapatalaza sebeliso yamasheleñi, kunyatela mapampili kamafosisa, kuloba mulao wabubangoki bwakulela, kuhana kapa kubata kupata bupaki, nikuloba mulao obona zamutelo.
Lubasi lwa Mukena batalimana ni likakalezo ze85 zabulyangelino, kubata kuuzwa, wamusali anosi likakalezo ze84 zakunyatela mapampili kamafosisa, lubasi kakalezo iliñwi yakuloba mulao obona zabubangoki bwakulela, bulalu cwalo kakalezo iliñwi yakupata bupaki kapa kubata kupata, mi Manga kakalezo iliñwi yakuloba mulao obona zamutelo.
Habasika itumelela mafosisa kwalikakalezo kaufela. Kuakalezwa kuli bulyangelino nebuezahezi mwahala Lungu 2013 ni Liatamani 2017.
Manga nabeleka kwakampani yaMultiChoice kakuba yomuhulu wakufundota kwakampani yebona zakupatalaza famazimumwangala. Nafilwe musebezi wakupatalaza lisebelezo zakampani mwamitende, hamoho cwalo nikunyatela mapampili abata litifo kuzwelela kwalikampani zene babaza.
Bazekisi bamuuso baakaleza hape kuli Manga nasebelisize kolo yeo nikukala kuipangela mapampili atokwa litifo, fone kuna ni libizo la mutende waKundana ohatiswa kaviki kimutende waNew Era.
Kuakalezwa hape kuli kasamulaho Manga atamiwa, yena ni muuna’ hae nebakupile Antonio kuli abulele kabuhata kupuma MultiChoice kuli neli muña kampani yebizwa KundanaNam, yene filwe lisebelezo zakufundota, nikuli masheleñi kaufela nalifilwe kuyena.
Bazekisi bamuuso hape baakaleza kuli MultiChoice nelatehezwi masheleñi alikanaN$2088071,kabakalabulyangelino ni buputeleli bone buezizwe kibabanyazwa babalalu. Antonio uyemelwa ki Mbanga Siyomunji, mi mubuso uyemelwa ki Tuna Iitula.
Nawa-Mukena ni Antonio nebalukuluzwi kasamulaho akulifa masheleñi akulibelela muzeko kwande asitokisi, mi Mukena nalukuluzwi kakufiwa mamela.