Kansela woshikandjohoololo shaShikango a yandja omatalashe kovakulupe
Kansela woshikandjohoololo shaShikango Ndatala Esther Nghidimbwa okwa yandja omatalashe kovakulupe momukunda Oshimumu, moshitukulwa shaHangwena.
Ovakulupe ava okwa li va didilikwa kombelewa yakansela tava mono oixuna ve li momhumbwe yomatalashe okombete. Okwa li a shike hava nangala pedu pa yalwa oikumbafa.
“Onda pewa oshinakuwanifa kepangelo opo ndi ninge kansela woshiwana ame ondi shiive ndi yakule oshiwana eshi shi li momhumbwe. Onghee onda hala okukwashipaleka kutya ovanhu aveshe a va ve li momhumbwe yoikulya ile oikumbafa noikutu, nosho tuu ohandi ke va kwafa ngaashi tashi dulika,” Nghidimbwa ta ti.
Oshivike sha dja ko mEtivali kansela ou okwa li yoo natango a yandja oikulya noshivelelwa kovakulupe ve li moshikandjohoololo shaye ava kwa li ve li moluhepo tava fi ondjala. Nghidimbwa okwa ti ombelewa yaye otai kwafele keshe omunhu ou a pumbwa ekwafo, onghee oshiwana nashi kale tashi kwatafana nombelewa uuna shi li moupyakadi.
Nghidimbwa omatalashe aa a landela ovakulupe okwa landa noshimaliwa sha dja modjato yaye mwene shaashi oku na oshisho noshiwana shaye.
“Oshififa ohoni okukala ongakansela ashike moshikandjohoololo shoye omu na ovakulupe tava mono oixuna tava nangala pedu ile va pumbwa oikulya. Onghee onda tokola opo ndi landele ovakulupe ava oikwafifo, vo va kale tava nangala komatalashe eli pamufika muwa,” Nghidimbwa ta ti.
Okwatiokukalaomulelimuwa ongeenge omunhu ta kwafele oshiwana, ndele kasha shi ashike okukala omutumba mombelewa wa mwena. Onghee okwa twa ovaleli vakwao omukumo opo va kale tava kwafele oshiwana shi li moluhepo moshikandjohoololo shavo.
Nghidimbwa okwa ti oku na ondjodi opo a tungile ovanyasha vomoshikandjohoololo shaye omatala apa tava kala tava landifile oinima yavo ei va longa okupitilila meepoloyeka davo.
Kansela okwa kunghilila oshiwana opo shi liufe komilandu doCovid-19 shaashi omukifi ou owa nyika oshiponga neenghono.