South Africa a mona kutya ehokololo lounona 10 olanakalindi
EHOKOLOLO la nyanyangidwa mounyuni aushe kutya omukainhu Omusouth Africa Gosiame Sithole okwa mona ounona 10, oloipupulu –omakonaakono a ningwa pambelewa eshi mona mo. Kape na nande oshipangelo shimwe moshitukulwa shaGauteng sha nyolifa oludalo lelongo lounona omulongo –epangelo lopashitukulwa tali ti.
Omakonaakono opaunamiti okwa ulika kutya Sithole kali nande nande eli meteelelo omido edi.
Omunamido 37 ou paife okwa tulwa moshipangelo shouvela wopamadilaadilo omo ta talika nawa, noku xungwa omwenyo.
Omushangwa wopambelewa inau popya sha kutya omolwashike omukainhu ou a kufa kekofi.
Oshikundaneki shoIndependent Online (IOL) osho sha tameka momahokololo oo, osha kala sha dama mehokololo lasho tashi ti ehohololo oloshili.
Osha ti nokuli kutya ounona ovo ova dalelwa koSteve Biko Academic Hospital momafiku 07 Juni, tashi ti ovayakuli koshipangelo oko kava li veli longikidila oludalo olo.
Tashi lundile noshipangelo kutya ina shi ungaunga noludalo olo nawa nosha hepeka ounona naina.
“Omapopyo oo kae na omakanghameno, kaeshi oshili, nokwa longifwa ashike oku nyateka edina loshipangelo shetu shaSteve Biko Academic Hospital,” omushangwa wepangelo tau ti. Onghatu yopaveta otai ka kufilwa oshikundaneki shoIOL nomu dindoli washo Piet Rampedi –oshipangelo osho sha ti.
hokololo eli ola dja peni hano?
Gosiame Sithole, oo e na ounona voukwanambwiyu vena omido hamano opamwe nomulumenhu waye Teboho Tsotetsi ova kala moTsembisa, olukanda li li moshitukulwa shaGauteng, popepi naJohannesburg.
IOL okwa hokolola kutya omukainhu nomulumenhu ou okwali hava i kongeleka imwe nomudindoli Rampedi, koo ok oveli shivila muDeseba. MuMei, oshikundaneki eshi osha ya meenghundafana nooSithole naTotetsi ovo va holola kutya Sithole oku li meteelelo lounona vahetatu –omafano oo a fanekwa okwali taa holola Sithole e li medalelwapeni. Oludalo ola li la shivifwa koshikundaneki shoPretoria News momafiku 8 Juni, tashi ti osha pewa ouyelele kuxe younona Totetsi.
Konima ta ti okwa mona onghundan yoludalo lounona vaye moSMS oyo a tuminwa komuholike waye, ashike ye ounona kali a pitikwa eke va talele po omolwa omangabeko oCovid-19.
Rampedi naye okwa popya ashike nomukainhu ou koWhatsApp, ashike kali a ninga ongendabala a mone ekwashilipaleko loshinima eshi kelelo loshipangelo.
Mayola wodoolopa yavo naye okwa shilipaleka oshinima osho –noikundaneki okwao mwa kwatelwa oBBC oye shi kundaneka, ashike epangelo ola ti fiyo opo po kapa li nande omunhu umwe a li na mona ounona ovo. Omaano okwa tameka oku kunguluka a yuka kofamili oyo, a kwatela mo oshimaliwa sheeRand Omiliona imwe yandja komunashipundi woIOL Iqbal Survé. Ashike ovanhu ova tameka oku limbililwa eshi oshikundaneki shoPretoria News sha dopa oku tomona edina loshipangelo omo mu na ounona, naashi oipangelo ihapu moGauteng ya tameka oku li kanyuna tai ti kai shi apa ounona ovo va dalelwa. Komima yomafiku 10 eshi ounona vadalwa IOL okwa tameka nokuli oku ulika omunwe oshipangelo shime momudingonoko.
“Ovadali” ava va vali ova tameka oku ulike kutya itava popi vali ewi limwe eshi Tsotetsi a lopota kutya Sithole ke wetike, noshiwana nashi xulife po oku yandja omaano, ashike Sithole okwa ti omulumenhu waye okwa hala ashike oku kala oye ta li nawa –ta t iota li nedina lounona.
Ovalongi voundjolowele ove shi pondola oku konga noku mona Sithole oo a itavela opo a ningilwe omakonaakono opauhaku –ovakaleli po vepangelo moGautenga tava ti.
Omushangwa wa nyolwa koRampedi okwa yandja ombili koIOL molwaashi a nyateka edina nefano loshikundaneki eshi, ta ti okwa li e na oku ninga omakonaakono omoule omanga ehekololo ina li shangwa, ndele haku endelela oku nyola a hafife ovapwilikini ngaashi a ninga.