Oomwedhi ntano dhomahepeko gaakiintu naanona mOshana
IIPOTHA yomahepeko gomomagumbo yili 150 oshowo omakwato koonkondo geli 28, oya lopotwa momwedhi ntano numvo mOshitopolwa shaShana.
Ngoloneya gwoshitopolwa shaShana Elia Irimari okwa ti, omwaalu ngoka ogundji noonkondo nooguka natango pombanda kehesiku.
“Oshuuvithi nayi noonkondo, iilonga iiwinayi tayi longwa moshilongo sha mangaluka, shika itashi pitikwa shi tsikile,” Irimari ta popi ngaaka.
Ta ti, omahepeko gatya ngaaka, otaga longelwa unene aakintu oshowo uunona, no gena okukandulwapo.
Irimari okwa ti, iipotha ayihe mbyoka oya lopotwa moshitopolwa shaShana ashike, moomwedhi ntano dho petameko okuza Januali sigo Mei.
“Shika nashi hulepo, oshigwana nashi hulithepo okulongela ooyakwawo omiyonena dhatya ngaaka. Oshigwana nashi simanekathane, sho nashi kale shina ombili nelandulathano ewanawa kaalina omayipumo mumwe,” taku magidha.
Irimari okwatumbula wo oluhepo lwomahala gwomayinyanyudho moshitopolwa shaShana, omahala gwokudhanena omawudhano gayooloka oshowo okuninga omadhewo.
Ta ti, ayihe mbyoka otayi vulu okushonopala uuna pena omahala gwomayinyanyudho oshoka iilonga yatya ngaaka olwindji ohayi ningwa kaanyasha mboka haya kala momagumbo noku longitha iingangamithi oshowo iikolitha hayi tumakanitha omadhiladhilo gawo noku kalonga omiyonena.
“Omahala gwomayinyadho otaga hili mo oyendji momapandaanda noku shonopaleka iilonga iiwinayi moshigwana,” ta ti ngaaka.
Ngoloneya okwati, omalelo goondoolopa Oshakati oshowo Ongwediva oga tengeneka okulonga omahala ngoka nuumvo omanga gamwe geli metifa no geli po kupwa.
“Andi tsikile okukumagidha oshigwana shi hulithe po okulongelathana omiyonena oshowo shi kale tashi lopota ku yele una sha taalela omawupyakadhi gatya ngaaka, ga vule ga kandulwe po.
Omuhungi mwenyo gwomOshakati Selma Nathanael, ngoka ha shungo omwenyo momalukanda noku pwiikina omawupyakadhi oshowo omahepeko gwomomagumbo, moonkundathano naKundana okwati, aantu oyendji oya taalela omahepeko ihe oya mwena.
“Oyendji otaya lilile momitima, sho shoka aantu taya si omaso gwombaadhilila nenge taya ikutha oomwenyo oshoka oyena uumbanda okuholola noku popya omawupyakadhi ya taalela,” Nathanael ta fatulula ngaaka.
Ta ti, okwa tsakaneka aantu oyendji ya taalela omahepeko, iha oya tinda okuga eta puuyelele oshoka anuwa oya tila oshoka oyambandamekwa kwaa mboka ta yeya hepeke.
“Omeme yamwe oyeli momagumbo, ihe otaya dhengwa uusiku awihe kaaholike yawo, kaapena nando etompelo limwe. Aanona yamwe otaya thiminikilwa momilalo noohe, ihe oya lombwelwa kutya ngele oye shi popi otaya dhipagwa,” ta popi ngaaka.
Takumagidha ta ti, oshigwana nashi uveko kutya oshili moshilongo sha manguluka, uuna wa taalela uupyakadhi wuli ngaaka, thika mbala poombelewa dhookansela kehe, opena aahungi mwenyo, mboka taya vulu okukwathela mbala, no wuli megameno.
“Aantu mboka otaye mumbandameke ashike, ihe kayena oonkondo ye vule ooveta dhoshilongo shika, thikameni nena eta mu popi mo omawupyakadhi mwataalela, omwa gamenwa,” taku magidha ngaaka.