Omundilo wa tukuka kexupulifo laTB Joshua
Omundilo owa tukuka metungo lili meni longeleka yoSynagogue Church Of All Nations (SCOAN) moLagos konguloshi yOmaandaxa pefimbo ovanhu vata xupulifa omuleli nomutotipo wongeleka oyo.
Omuevangeliste ou a fimana nokwa eta ounyuni koNigeria omolwa oilonga yaye youprofeti okwa xulifa momafiku 5 Juni neudo, eshi ku na ashike omafiku manini opo a wanife omido 58.
Oshivilodimbuluko shaTB Joshua osha tameka mOmaandaxa oshivike eshi mongeleka yaye.
Omundilo owa monika lwopo tundi 23h00 wa tema mokafitola kongeleka oko ke li ashike eemeta dinini oku dja monhele yoku ongalela metungo limwe nongeleka,.
Osho sha etifa omundilo fiyo opapa ina shi shivika, ashike omunailonga umwe koSCOAN oo ina hala edina laye li tumbulwe molwaasho ina pewa oufemba woku popya noikundaneki okwa ti otaku fekelwa kutya omundilo owa etwa keengodi dolusheno.
Eshi sha ka tya pokati koufiku, omundilo owa hangwa nale wa dimwa kengungo lovakwaneongalo ovo va longifa omavela nomandini tava teke pongeleka imwe yopoushiinda.
Ovanambelewa vomundilo ove ke ya po potundi 24h00 ashike ova hanga omundilo wa dimwa nale.
Oshiviloxupulifo shaJoshua osho tashi kala oule woshivike ashishe osha tameka momafiku 5 Juli nengungo lovanhu va humbata oulexite va yu ka komhunda yeilikano koIkotun moLagos.
Imwe yomwaayo kwa teelelwa i ningwe pefimbo loshivilodimbuloku oya kwatela mo oxungi yehekeleko yali ko onghela fiyo onena, etalo koshipala mongula, epako monghelainya momafiku 9 Juli) nosho yo oshivilo shoku yandja omapandulo momafiku 11 Juli.