Aanona ya valelwa mokamba yoontauki pEtunda otaya ka pewa uukwashigwana
NGOLONEYA gwoshiopolwa shaMusati Erginus Endjala, okwa ti uunona mboka tawu valelwa kaakuluntu Aangola mokamba yoontauki pEtunda otau ka pewa uukwashigwana gwaNamibia.
Okuza muMaalitsa Aangola ya konda po3000 oya tameke oku taaguluka oongamba noku ya moNamibia omolwa ondjala koshilonga shawo. Sigo oompaka, mokamba omwa valelwa aanona yeli 28.
“Uunonaauhembukaotaukamonauukwashigwana gwaNamibia, wo ishewe otawu ka shashwa. Ngame ondi na elago oshoka onda lukilwa po kamwe komuunona mbuka,” Endjala ta ti
Endjala okwa ulike wo olukeno molwa aanona mboka yeli mokamba yeli pethimbo lyoku ya kosikola, ashike itaye shi ningi omolwa onkalo moka yi iyadha. Ta pula aasi henda mboka taya vulu okuu kwathela omambo noopena yeshi ninge, ta ti wo mboka taye ki iyamba oku longela aanona momiti dhomokamba nayo wo otaya ka pandulwa.
Endjala dhika okwe shi popi pethimbo a li ta tambula ko omakwatho ga yambidhidwa nago oontauki kehangano lyoNamibian Solar Solutions. Ehangano ndika olyo limwe lyomomahangano moshilongo ngoka ga yamukula ehiyo lyaNgolonewa gwoshitopolwa shaMusati Erginus Endjala, ngoka ta kongo omakwatho goontauki dhaAngola ndhoka dhangundumana kEtunda.
Iinima mbyoka ya taambwa ko kungoloneya oyi na ongushu yili poN$17 000, noya kwatela mo uushako wuusila gwepungu, omagadhi dhokulya noondooha dhoohi.
Pethimbo mpoka okwa kumagidha woo oontauki opo dhi kale tadi iyutha komalandulathano oCovid-19, ta ti yamwe yomoontauki otaya endagula, taye ya nokuza mo mokamba ngaashu ya hala, ta ti oshinima shoka osha thika ko kombelewa ye.
“Otulye ni momathimbo omadhigu, alikana kale ni mokamba. Ngele oCovid-19 oye ya mo mokati keniotashi ka kala oshidhigu oku yi lwitha,” Endjala ta ti.
Sigo ompaka mokamba omu na oontauki 2700, ashike omuyalu ngoka ohau indjipala go tagu ninipala oshoka oontauki ohadhi endagula, po ishewe opu na yamwe aape opo taye yam o.
Leticia Shahula ngoka a gandja iikwatha mbyoka kungoloneya okwa ti okwali a uvu moradio, shongoloneya a li ta pula aanengeshefa opo ya yambidhidhe aantu mboka ya ngundumana kEtunda. Ta ti nonande ongeshefa yawo otai shongola molwa oCovid-19, ye nehangano lye oya tokola opo ya ikuthe okashona taya vulu, opo nayo ya umbile ko sha koshigwana shoka.
Teya kumagidha opo ya kale ye na eitaalo muKalunga neineekelo kutya onkalo yayo nayo onayi ka lunduluke. Ta ti naya kale muukumwe, yo naya longele kumwe.
Omulumentu ngoka a ti olye Mulyooko okwa popya pehala lyayakwao ta ti oya noonkondo pandula kehe ngoka te ya yambidhidha oshoka oye li muudhigu uunene gwondjala.
“Otwi inekela kutya ngele omvula oya loko, ota tu shuna koshilongo shetu, ashike ngele ina yi loka opo ngaa tatu kala mpaka. Ta pula aantu ayehe mboka taya vulu oku ya kwatha niikulya yeshi ninge oshoka natango onkene ngaa ya sha ondjala.