Algeria a tameke oosa dhaantu 69 ya sila momulilo
ALGERIA okwa igidha omasiku gatatu goosa dhopashigwana dhaantu 69 mboka ya dhipagwa komulilo gwomokuti. Moonakusa mbaka ya sile mepeya omwa kwatelwa aakwiita 28, mboka yali taya kwathele okudhima omulilo.
Mbaka oya sile momulilo omunene ngoka gwa tukuka moondundu mEtitatu moshitopolwa shaKabylie shili muuzilo gwoshilandopangelo.
Ookadhima omulilo omilongo oyali ya kondeke okuti oku za kongulohi yOmaandaha, nominista yiikwameni Kamel Beldjoud okwa takele omunwe aatomeki yomulilo, ihe ina gandja naanaa uuyelele gulwe.
“Osha yela kutya oshinima shika osha longwa kaakolokoshi, mboka ya tomeke omulilo komahala ge vulithe 50 moshilongo,” ta ti ngaaka.
Oshiwike shazi ko oshikondo shoku konaakona ewangandjo moEuropean Union osha ti oshitopolwa shaMediterranean osha ninga ehala lyomapeya sho omalaka omanene gomililo yiikogo iiluudhe yolwithi ya tukuka moTurkey nomoGreece.
Aakalimo yomoshitukulwa sha Tizi Ouzou moKabylie oya longitha omandini gomeya oshowo iihwa iitalala moku kambadhala ya dhime omulilo ngoka.
Yamwe yomaakwiita mboka yali taya kwathele oya sile komahala ga yooloka, omanga omanga yamwe ya sile moKabylie sho ya kondekwa komulilo noya nyengwa oku za po mpoka ya adhika. Uuministeli wegameno owa ti kakele kaakwiita mboka ya si, oyendji oya mono iiponga noonkondo.
Omagumbo ogendji oga pa po, noofamili odhindji ngashingeyo odha edhililwa koomihandjo dhaagundjuka nokiiputudhilo yopombanda.
“Egumbo lyandje olya papya po thilu thilu, ina pu hupa sha,” Mohamed Kaci ngoka ye naanegumbo lyo ya matukile kohotela yili komukunda Azazga ta ti.
Omupilima gwoshilongo Ayman Benabderrahmane okwa lombwele iikundaneki mEtiyali ta ti epangelo oli li moonkundathana niilongo mbyoka lya panga nayo uukuume opo ya tuminwe oondhila dhoku ya kwathela oku dhima omulilo.
Ta ti mongashingeyo ookadhimamulilo naakwiita oyi itula unene moku gamena aantu komulilo ngoka nota ya kondjo opo pu ha kale we kekanitho lyoomwenyo. Ta ti mboka ya kanitha medhina lyomulilo otaya ka futilwa.